Shkrimtari dhe publicisti Fatos Lubonja thotë se qeveria e Edi Ramës ka rritur autoritarizmin. Sipas tij “forca e errët” e maxhorancës po e rrëzon këtë opozitë. Lubonja u shpreh në një intervistë në News 24 se opozita duhet të bëhet bashkë në një aleancë të madhe.
“Qeveria ka rritur autoritarizmin. Po bën që njerëzit të jenë me maxhorancën me forma të ndryshme, me bukën e gojës, me patronazhimin. Unë shoh dhe dobësim të opozitës, edhe për shkak të historikut të opozitës. Edhe Jezu Krishti të ndërtonte opozitë në Shqipëri, këta do e eliminonin, sepse kanë forcën.
Opozita duhet të bëhet bashkë në një aleancë të madhe, që të ndalojnë këtë mazhorancë, që vazhdon me idenë që e kam thënë më herët krimi ndjell krimin. Për fat të keq, forcat e reja, që i mbështes, nuk duan një opozitë të madhe, por duan ta marrin vetë edhe ushtrinë e Berishës dhe të Metës.
“Forca e errët” e mazhorancës mund ta rrëzojë këtë opozitë. Ajo që ndodhi në Himarë ishte parathënie e asaj që ndodhi në zgjedhjet e vitit 2025. Nuk besoj se gjërat do të zgjidhen në Shqipëri me zgjedhje. Ajo që shoh është shembja e tunelit, kur të mbarojë pastrimi i parave dhe mos ketë më para. Ka punuar Rama në korruptimin e çdo opozitari”, - tha Lubonja.
Lubonja komentoi edhe nxjerrjen e kontejnerëve me mbetje toksike nga vendi ynë që sipas tij është një ngjarje është e rëndë. Ai tha se të tilla gjëra ndodhin, kur njerëzit nuk e duan sinqerisht atdheun e tyre, por shikojnë se ku mund ta shfrytëzojnë atë.
“Është e tmerrshme, për të mos thënë skandal. Duke u nisur nga rritja e kriminalitetit në Shqipëri, dyshoj që në një vend, ku njerëzit pyllin e shohin me syrin e druvarit, sesi ta pres, detin sesi ta betonizoj etj, nuk ka dashuri të vërtetë për atdheun.
Kur ndodh kjo, përfshihen dhe institucione. Nuk mund të thuash dot që kumbullat hahen nga disa pa e ditur shteti. Ky shtet është i hajdutëve dhe punon për hajdutët”, - u shpreh Lubonja.
Duke folur për turizmin në Shqipëri, Lubonja deklaroi se ndjen keqardhje për betonizimin e bregdetit. Sipas tij, çmimet në bregdet janë rritur, edhe për shkak të pastrimit të parave.
“Bregdeti është betonizuar. Çmimet janë rritur në bregdet edhe për shkak të pastrimit të parave. Për shkak të rritjes së çmimeve, shumë shqiptarë e kanë të pamundur të shkojnë me pushime. Edhe natyra shqiptare është shkatërruar. Çmimet e çadrave për një ditë ka raste që kalojnë dhe Italinë.
Një e huaj shkruante se nëse vijohet kështu në Shqipëri, edhe mund të ikin turistët, sepse nëse ka betonizim, natyrisht do ketë probleme. Fushata e bërë nga qeveria është disi e fryrë. Turizmi, përpos çmimeve, ka shumë probleme. Të ruajmë pjesën e gjelbërt që na ka mbetur”, - tha Lubonja. ©LAPSI.al
