Ministrja Albulena Haxhiu ka firmosur kërkesat e ekstradimit për shtetasit Rigels Rajku (Noizy), Bahtjar Bajraktari (DJ Crax) dhe Arkimed Lushaj (Stresi), të cilat i janë përcjell Ministrisë së Drejtësisë në Tiranë, si autoritetet përgjegjës për ekstradimet.
Këtë e ka konfirmuar për "Telegrafin" edhe këshilltari i ministres së Drejtësisë, Genc Nimoni.
Ministrja Albulena Haxhiu i ka kërkuar zyrtarisht homologut Ulsi Manja arrestimin e përkohshëm të tre shtetasve të mësipërm, me qëllim ekstradimin e tyre më pas në Kosovë, për t'u përballur me akuzat për rrahjen barbare të boksierit Med Iseni dhe kunatit të tij.
Mesa duket, pas kësaj kërkesë në rrugë zyrtare, autoritetet në Shqipëri janë vënë në lëvizje dhe mbrëmjen e djeshme një nga njësitë elitë të Policisë së Shtetit, Njësia Fast Albania në Departamentin e Policisë Kriminale ka bërë prangosjen e Noizyt dhe Dj Crax. Në kërkim vijon të jetë Stresi.
Për arrestimin e reperit dhe mikut të tij është angazhuar Njësia K e forcave operacionale në Policinë e Shtetit, e njohur dhe si FAST Albania, e cila përbëhet nga oficerë karriere që merren kryesisht me lokalizimin dhe prangosjen e shtetasve të kërkuar, brenda dhe jashtë Shqipërisë.
Për shkak te bujës së madhe që mori rasti dhe karshillikut që i bënin shtetit Rigels Rajku dhe Bahtjar Bajraktari, Policia shqiptare ka angazhuar nga një njësitë elitë të saj.
Oficerët kanë qenë gjatë gjithë kohës në vëzhgim të këtyre dy shtetasve që u përfshin në një sherr të dhunshëm në Kosovë dhe si për t'i treguar reperit që vazhdonte koncertet sikur të mos kishte ndodhur asgje, edhe pse ishte në kërkim, FAST Albania ka mësyrë në mes të Lezhës dhe i ka hedhur prangat Noizyt dhe Dj Crax pak para se të shkonin për të performuar në një lokal nate.
