U mbyllën në orën 19.00 të 36 qendrat e votimit për zgjedhjen e kryetart të bashkisë së Himarës. Mediat raportojnë se në orët e pasdites pati më shumë fluks votuesish pas një rënieje në orët e drekës për shkak të orarit dhe vapës.
Në çdo qendër janë mbyllur kutitë dhe së bashku me materialet do të dërgohen pranë KZAZ-së së ngritur pranë stadiumit të Himarës ku edhe do të kryhet numërimi.
Sipas KQZ-së deri në orën 19:00 kanë marrë pjesë 37.78% e qytetarëve, sipas KQZ ose 8124 zgjedhës. Në zgjedhjet e 14 majit 2023 deri në këtë orë kishin dalë për të votuar 33.87% e votuesve.
Në garë për të fituar mandatin janë kandidati i PS-së, Vangjel Tavo dhe ai i opozitës, Petro Gjikuria. Rezultatet e para priten pas mesnatës. Kryefjalë e këtyre zgjedhjeve ishin kartat e identitetit të skaduara.
Mbi 6 mijë votues nuk u lejuan të votonin pasi u kishte skaduar afati i këtij dokumenti. Ndryshe nga zgjedhjet e kaluara këtë herë autoritetet nuk lejuan përdorimin e këtyre dokumenteve. ©LAPSI.al
