Partizani nuk zhgënjen pritshmëritë. Kampionët në fuqi të vendit, mposhtin 1-0 Skënderbeun në gjysmëfinalen e parë të Final 4, duke u kualifikuar në finalen e madhe për titullin. Archange Bintsouka vendosi ndeshjen në Arenën Kombëtare, dme një goditje me kokë, pas asistit të Rrapaj. Tani të dielën, do të mësohet edhe kundërshtari i të kuqve në finale, që do të jetë një mes Egnatias e Vllaznisë.
Shehi vendosi të përdorte sigurinë, me dy qendra në një 4-4-2 klasike. Mba e Skuka u bënë menjëherë të rrezikshëm, në një ndeshje ku, në fakt, të besuarit e teknikut Orges Shehi nuk u vunë thuajse asnjëherë në vështirësi. Partizani kishte dy rezultate në favor (edhe barazimi e dërgonte në finale) e megjithatë kërkoi të mbyllte ndeshjen sa më shpejt. Gvozdenovic dhe korcarët nuk e mbajtën dot ritmin dhe e lanë praktikisht spektator Qirkon. Kryeqytetasit, për më tepër para publikut të shtëpisë, dominuan çdo aspekt të lojës.
Ajo që ndoshta duhet të ketë disi kujdes tani Partizani është seria e rasteve të shpenzuara para portës. Tentativa jashtë kuadratit, por edhe nxitim në finalizim, që bënë që goli i vetëm të ishte ai i Bintsouka në minutën e 47'. Në fushë për 20 minutat e fundit edhe Cara, pas dëmtimit, me teknikun që shpreson ta ketë në formën më të mirë për finalen e 26 majit, sërish në impiantin e kryeqytetit.
Lexo më tej: Video/ Sulmuesi i Genoa, Ekuban e Ramadani i Lecce, nxisin Partizanin për fitore: "Hajde çuna, forca"
Skënderbeu do të luajë në finalen e vogël të 24 majit për vendin e 3, ku përballë do të ketë humbësen e gjysmëfinales tjetër, mes Egnatias e Vllaznisë. Edhe pse për bardhekuqtë nuk është se ka shumë rëndësi, duke qenë se në Europë nuk luajnë dot për shkak të dënimit ende në fuqi nga UEFA.
[video width="638" height="360" mp4="https://cdnimpuls.com/lapsi.al/wp-content/uploads/2024/05/6647aa322f2b8.mp4"][/video]
