“Unë te PSG? Dëgjova disa zëra merkatoje, nuk dija asgjë për të dhe nuk u interesova. Mendoja mbi të gjitha që të përgatitesha sa më mirë për sezonin. Kam ende dy vite kontratë me Juventus dhe ndihem mirë. Do të doja të fitoja diçka të rëndësishme këtu, pastaj të shohim, do të flasim për të më vonë”. Dusan Vlahovic hedh poshtë hipotezën e një të ardhmeje në Francë gjatë një interviste ekskluzive me gazetën L'Equipe. Serbi përcakton qartë edhe synimet për të ardhmen: "Do të doja të bëhesha një lojtar që të gjithë ta mbajnë mend. Topi i Artë? Është një ëndërr dhe një objektiv".
Keqardhja për titullin: "Kualifikimi për Champions League dhe Kupa e Italisë? Do të ishte mirë, natyrisht, nëse do të kishim sukses në të dyja, por nuk mund të jemi plotësisht të kënaqur. Ky është mentaliteti i këtij klubi dhe një kërkesë e historisë së tij. Ne kishim mundësinë për të luftuar për titullin, në një moment nuk ishim larg. Por të jesh në luftë në shkurt nuk do të thotë asgjë e nuk ka rëndësi. Në fund të majit shihet se kush është aty. Keqardhjet janë të pashmangshme, por kemi ende shumë për të luajtur", tha Vlahovic.
Sezoni më i mirë bardh e zi: "Sezoni i kaluar shkoi kështu sepse nuk u ndjeva mirë fizikisht. Vuajta shumë. Këtë vit ndihem mirë, kjo është e vetmja gjë që ka ndryshuar. Për pjesën tjetër bëj gjithçka njësoj, unë punoj shumë, përqendrohem te rikuperimi. Në këtë sezon shënova 16 gola (17 duke përfshirë Kupën, red.) por mund të kisha bërë shumë më tepër. Unë gjithmonë dua të bëhem një lojtar që njerëzit do ta mbajnë mend dhe për të bërë një karrierë të vogël e për të fituar para nuk më intereson".
