Rrëzimi në Kupë me Erzenin ishte vetëm një rastësi, Vllaznia kthehet të marshojë në kampionat, duke mposhtur në ndeshjen direkte për 'Final Four' Dinamon. Vendosi Alivoda me një gol spektakolar, që shembi skuadrën e Mehmetit, pas pesë ndeshjeve pozitive radhazi. Me këtë rezultat, Vllaznia është ngjitur e vetme në vendin e dytë.
Në ”Niko Dovana”, kryeqytetasit ishin më insistues në kërkim të një goli, që do ti jepte mundësinë të ngushtonte diferencën me shkodranët në renditje. Osmani duke e parashikuar këtë mënyrë loje të kundërshtarit, preferoi të mbrohej me rregull e të kundërsulmonte me shpejtësi. Denison e Vila frikësuan portierin Mëhidri, ashtu si bëri Balaj me Salin. Ndeshja u zhbllokua në minutën e 28', kur Alivoda realizoi mjeshtërisht, duke e dërguar topin aty ku Sali nuk mund të arrinte.
Dinamo reagoi me Markun, por ishte një ndeshje me përgjigje e kundërpërgjigje. Mëhidri e Sali nuk gabuan asgjë në ndërhyrjet e tyre, me nëndetësen që mori kontrollin e lojës, duke u shtyrë përpara. Nëse rezultati nuk ndryshoi, është sepse Vllaznia pati edhe fatin me vete, kur Vila u ndal nga traversa. Në fund, Dinamo mbeti me 10 lojtarë pas kartonit të kuq për Hoxhën në minutën e 87'. Ndërhyrja nga pas ndaj Balajt fillimisht u ndëshkua me të verdhë, por pas kontrollit me VAR, arbitri Cjapi ndryshoi vendim dhe Dinamo e mbylli me një lojtar më pak.
Vllaznia është tashmë e vetme në vendin e dytë në renditje, duke u ngjitur me 43 pikë, mbi Partizanin dhe - 5 nga Egnatia kryesuese. Dinamo tani është me pikë të barabarta me Tiranën, por zbret me diferencë golash poshtë bardhebluve, jashtë zonës Final Four.
