Në ndeshjen që mund të përcaktonte qartë se për cfarë objektivi do të luante, Dinamo nuk gaboi, duke shkatërruar 0-4 Erzenin. Në javën e 22 të Superiores nuk pati praktikisht sfidë në Rrogozhinë, me të besuarit e Mehmetit që shpërfytyruan kundërshtarin me një poker. Hoxha e Kaçorri i dhanë drejtim ndeshjes në pjesën e parë, Zabërgja e Bardhi mbyllën llogarinë.
E çuditshme po të mendosh, që shijakasit ndryshuan një pjesë të mirë të lojtarëve për të nisur kthesën, e tani janë në situatë edhe më të vështirë. Tre humbje një barazim e një fitore të vetme për skuadrën e Deliallisit, që tani duhet të frikësohet seriozisht për mbijetesën. Dinamo dominoi ndeshjen ndaj shijakasve, duke zhbllokuar takimin me golin e Hoxhës në minutën e 32'. Erzeni e ndjeu goditjen dhe pa shkuar në pushim, pësoi edhe golin e dytë nga Kaçorri.
Shijakasit u munduan të reagonin në pjesën e dytë, por shpërdoruan disa mundësi të mira para portës kundërshtare. Katër zëvendësimet e Deliallisit ndryshuan mënyrën e lojës, por jo rezultatin që Sali e ruajti të paprekur. Dinamo bëri pastaj lojën e preferuar dhe në kundërsulm ndëshkoi me Zabërgjan pesë minuta nga fundi. Bardhi pastaj e bëri pasivin më të rëndë për shijakasit, duke i shënuar edhe golin e katërt në minutën e 90'.
Lexo më tej: 13 ndeshje pa fituar në kampionat, shkatërron 3-0 Skënderbeun: Teuta i kishte mundur korçarët edhe në Kupë
Dinamo, që ka edhe një ndeshje për të rikuperuar me Skënderbeun, është larguar tashmë nga zona e ftohtë e klasifikimit. Me 28 pikë, Mehmeti mund të shtyjë për një vend në Final Four, tashmë vetëm 5 pikë larg. Tirana ka 33 pikë, por ka luajtur një ndeshje më shumë se Dinamo. Në anën tjetër, Erzeni mbetet me 22 në zonën playout, një mbi Teutën dhe -3 nga Skënderbeu.
