Të tetë takime brenda ditës me ndeshjet do të luhen në dy fasha orare: në orën 13:00 dhe 17:00. Kupa e Shqipërisë 2023/2024 do të rikthehet këtë të mërkurë me ndeshjet e fazës së 1/8-ave. Nuk mungojnë përplasjet interesante, duke qenë se në lojë janë futur edhe ekipet e renditura nga vendi i parë e deri në vendin e tetë në “Abissnet Superiore” për sezonin 2022-2023. Të gjitha ndeshjet do të luhen me vetëm një takim dhe skuadrat që do të kualifikohen për në çerekfinale do të vendosen të mërkurën.
Në orën 13:00 do të luhen gjashtë takime. Kryesuesit e Superiores, Egnatia do të përballet me Lushnjen. Ndërsa Partizani në fazën e 1/8-ave do të përballet me Apoloninë. Tirana në këtë fazë ka si kundërshtarë Korabin. Një takim i fortë është edhe një nga dy përplasjet mes skuadrave të Superiores: Laçi – Dinamo. Në të njëjtën orë do të luhen edhe dy sfida të tjera që premtojnë spektakël, Kukësi – Elbasani dhe Erzeni – Bylisi.
Kupa e Shqipërisë do të vazhdojë me dy sfidat e tjera që startojnë në orën 17:00.
Vllaznia do të luajë me Flamurtarin dhe, po në njëjtën orë, do të zhvillohet edhe një tjetër takim shumë i fortë mes dy skuadrave të kampionatit elitar të futbollit, Teuta – Skënderbeu.
