Michael Owen ishte i ftuar në Good Morning Britain me djalin e tij James për të folur për sëmundjen e tij të rrallë dhe të pashërueshme. Ish-sulmuesi i Anglisë dhe fitues i Topit të Artë në vitin 2001 e tani një komentator i njohur televiziv, po përjeton një moment të veçantë në jetën e tij. Pak ditë më parë ai tregoi historinë e djalit të tij 17-vjeçar James, i cili vuan nga sindroma Stargardt dhe është cilësuar si “klinikisht i verbër”, në një intervistë për Daily Mail.
Është një sëmundje e retinës që zakonisht shfaqet brenda dy dekadave të para të jetës dhe çon në humbje të rënda të shikimit. James u diagnostikua në moshën tetë vjeç, duke e detyruar atë të hiqte dorë nga ëndrra e tij për t'u bërë një futbollist profesionist. Shikimi i tij u përkeqësua gradualisht gjatë adoleshencës dhe tani situata është gjithnjë e më e ndërlikuar.
LUTJET E ÇDO NATE...
Owen ka rrëfyer në programin televiziv "Good Morning Britain" se ai fle "çdo natë duke u lutur që të gjendet një kurë" për sëmundjen gjenetike të djalit të tij.
Ish-futbollisti tha: "Supozoj se si prind, gruaja ime dhe unë ndoshta jemi ndjerë shumë më keq se James, gjë që tingëllon shumë keq të thuhet. Dëshiron tia largosh të gjithë dhimbjen, të vjen keq për të sa herë që ai hyn në spital dhe merr pika të reja që i pickojnë sytë dhe qan gjithë ditën. Ka qenë shumë e vështire kur kuptuam se kjo ishte një sëmundje e pashërueshme. Jetojmë në epokën e qelizave staminale dhe shkojmë në shtrat cdo natë duke u lutur që të ketë diçka për ta trajtuar, por për momentin është një gjendje që përkeqësohet me kalimin e kohës”.
FUTBOLLI E DOKUMENTARI
James Owen tani luan për një ekip futbolli të verbërish dhe tha se ishte një "lehtësim" të gjeje njerëz të tjerë si ai për të luajtur me të. Ndërkohë, ai po përgatitet të festojë ditëlindjen e tij të 18-të më 6 shkurt.
Michael dhe James Owen kanë njoftuar publikimin e një dokumentari të titulluar "Futbolli është për të gjithë". Ai do të shfaqet premierë më 30 janar në TNT Sports dhe do të thellohet në botën e humbjes së shikimit dhe sporteve. Ata shpresojnë të rrisin ndërgjegjësimin për sëmundjen Stargardt dhe sëmundje të tjera të syve përmes kësaj pune, e cila ofron një vështrim intim dhe frymëzues në kombëtaren e futsal të Anglisë për personat me shikim të dëmtuar, ndërsa përgatiten për Lojërat Botërore IBSA 2023.
