Oscar Pistorius është liruar nga burgu me kusht dhe tani është në shtëpi. Ky është lajmi i komunikuar nga departamenti i burgjeve të Afrikës së Jugut, pa dhënë detaje të mëtejshme. Njoftimi erdhi rreth orës 8:30 të mëngjesit me orën lokale. Zyrtarët e administratës së burgut liruan ish-kampionin paralimpik nga burgu Atteridgeville në kryeqytetin e Afrikës së Jugut, Pretoria, në orët e para të ditës. Pistorius ka vuajtur gati nëntë vjet nga dënimi i tij 13 vjeçar e 5 muaj për vrasjen e të dashurës së tij Reeva Steenkamp në ditën e Shën Valentinit 2013.
Drita jeshile për lirimin me kusht për Pistorius erdhi në nëntor. Në Afrikën e Jugut, të dënuarit për krime të rënda mund të lirohen me kusht pasi të kenë vuajtur të paktën gjysmën e dënimit. Komisioni përgjegjës për lirimin e parakohshëm shqyrtoi çështjen e tij dhe përcaktoi se "i burgosuri është i përshtatshëm për riintegrim social".
Lexo më tej: E shtypi qëllimisht me makinë: arrestohet çiklisti Rohan Dennis, akuzohet se vrau gruan
Ishte mëngjesi i 13 shkurtit 2013 kur në një lagje banimi të Pretorias, në Afrikën e Jugut, Reeva Steenkamp, një modele 29-vjeçare, hyri në shtëpinë e të dashurit të saj Oscar Pistorius. Ajo e kishte bërë gjithnjë këtë, me kopjen e tij të çelësave. Atë ditë donte ta surprizonte kur ai të zgjohej në ditën e Shën Valentinit. Kampioni paralimpik i atletikës, megjithatë, ishte në gjumë dhe kishte dëgjuar vetëm një zhurmë. Sapo ka parë një figurë që ka hyrë në dhomë, ka marrë armën që mbante pranë shtratit dhe ka qëlluar. Disa të shtëna, dy ose katër në varësi të versioneve. Të shtënat e goditën Reeva në kokë dhe krah, duke i shkaktuar vdekjen e menjëhershme.
