Juventus mposhti 2-1 Cagliari për të marrë fitoren e pestë radhazi në kampionat. Pak vuajtje në fund, por bardhezinjtë e Max Allegri janë tani në vendin e parë në kampionat: "Ishte e rëndësishme të fitonim për renditjen dhe të shkëputeshim nga ndjekësit - komentoi trajneri i Juventus në fund të ndeshjes -. Cagliari vinte nga një moment i shkëlqyer dhe pas 2-0 ne ndaluam së menaxhuari topin, duke pësuar më pas një gol që mund ta kishim shmangur”. Për të marrë tre pikët duheshin topat inaktivë: “Duhet të jemi më efektivë dhe të qetë në pasimin e fundit, por skuadra po rritet dhe ka një shpirt të jashtëzakonshëm. Tani kemi më shumë durim kur nuk gjejmë golin dhe mbetemi kompakt."
Juventus rriti ritmin dhe presionin në pjesën e dytë: "Në pjesën finale të pjesës së parë këmbët tona u ndjenë ndryshe, pasi vuajtëm në 30 minutat e para. Ne u kthyem mirë pas pushimit edhe pse duhej ta kishim zhbllokuar më herët takimin. U treguam të aftë për të përfituar nga topat inaktivë. Ne fituam me meritë."
Sulmuesit vuajnë për të shënuar, por Allegri duket se nuk e ka shumë problem: "Nuk jam i shqetësuar sepse i kanë mundësitë, golat do të vijnë. Ata duhet vetëm të qëndrojnë të qetë". Një provë e mirë e McKennie: "Ai po bën një kampionat të rëndësishëm, është pjekur dhe e ka vënë veten në lojë. Duhet të vazhdojë kështu sepse ka cilësi fizike që kompensojnë disa gabime teknike. Në hapësira është shkatërrues".
Lexo më tej: Video/ Juventus rrëmben fitoren e pestë radhazi, 2-1 ndaj Cagliari: Bremer-Rugani ngjisin bardhezinjtë në krye
MENDJA TE INTER
Pas pauzës është përplasja direkte kundër Inter: "Në një ndeshje të vetme çdo gjë mund të ndodhë dhe për këtë arsye nuk e di kush është favorit. Inter është sigurisht favorit për titullin, ne duhet të jemi të aftë për të qëndruar atje me të parat e renditjes. Zikaltrit janë ndërtuar për të fituar prej kohësh dhe mund ta bëjnë këtë edhe këtë vit".
Rritja e Juventus është evidente: "Meritat i shkojnë të gjithëve që punojnë në këtë skuadër. Ne duhet të mbajmë një profil të ulët për të krijuar atë normalitet që në bardhezi do të thotë të fitojmë ndeshje. Të punojmë në kufizimet tona, që të mund të bëhen pikat e forta. Ne bëmë mirë në 12 ndeshjet e para dhe merita është e të gjithëve, jo e imja”.
