Sezonin e kaluar, Arsenal ishte shumë afër arritjes së një suksesi të madh: fitimit të Premier League. Fatkeqësisht për Gunners, udhëtimi i jashtëzakonshëm përfundoi me vendin e dytë. Ndërsa kurorën e Anglisë e mbajti - edhe një herë - Manchester City. Një dëshpërim i shndërruar në dëshirë për revansh në klubin londinez. Arsenal dëshiron ta provojë përsëri dhe londinezët po kërkojnë përforcime: objektivi është mesfushori i talentuar i West Ham, Declan Rice. Dëshira për ta pasur në skuadër është vërtet e fortë, deri në atë pikë sa janë ofruar rreth 105 milionë paund (rreth 120 milionë euro).
E në këtë pikë ripropozohet dueli me Manchester City. Po, sepse pas muajsh beteje në fushë, sfida tani ka kaluar në një fazë të re, në merkato. Në fakt, Citizens janë të interesuar edhe për mesfushorin e kombëtares angleze. Pika e kthesës mund të ketë ardhur pikërisht tani. Arsenal, sipas Sky Sport UK, ka vënë në tavolinë 105 milionë paund dhe mbi 5 milionë plus bonuse si nënshkrim për lojtarin. Topi i kalon tani West Ham, që duhet të vendosë se cila do të jetë e ardhmja e kapitenit të tyre.
Lexo më tej: Supersticioziteti anglez, Rice në Katar me një valixhe bosh: është për Kupën e Botës
Rice, pavarësisht se është vetëm 24 vjeç, ka shumë eksperiencë. Pothuajse 300 ndeshje të luajtura në karrierën e tij, më shumë se 40 paraqitje për Anglinë dhe një trofe ndërkombëtar të sapofituar, Conference League. Sezonin e kaluar ai arriti në 50 ndeshje prezantim, duke shënuar 5 gola dhe duke dhënë 4 asiste. Ai ka qenë prej kohësh njeriu simbol i West Ham dhe tashmë është një nga elementët kryesorë të kombëtares. Tani ai thjesht pret që të jetë në gjendje të bëjë hapin e madh: gjithnjë nëse oferta e Arsenal do të konsiderohet e përshtatshme.
