Derbi Espanyol-Barcelona, në orën 21:00 në stadiumin RCDE, mund t'i japë fund garës për të fituar La Liga 2022/23. Duke mposhtur kushërinjtë e tyre, të besuarit e Xavi do të bëheshin të paarritshëm për Real dhe Atletico Madrid. Në këtë mënyrë Barcelona do të ishte matematikisht kampionë të Spanjës me 4 javë nga fundi. Duhet vetëm mposhtja e një kundërshtari të dëshpëruar për pikë shpëtimi. Në rast të një gabimi, festa do të shtyhej për të shtunën e ardhshme, në shtëpi ndaj Real Sociedad.
Sidoqoftë, numërimi mbrapsht ka nisur për Lewandowski dhe shokët e tij. Të gjithë blaugranat janë gati të festojnë marrjen e një trofeu të munguar prej katër vitesh. Duken pak, por nga pikëpamja sportive është një epokë më parë. Barcelona ishte e drejtuar nga Ernesto Valverde në pankinë. Në fushë tërhiqej nga golat e Messi (36 gola atë sezon), Suarez dhe Coutinho, me regjinë në mesfushë të Rakitic e Vidal.
Sot nga ai ekip kanë mbetur vetëm disa senatorë, si Busquets, Ter Stegen, Jordi Alba dhe Sergi Roberto. Një flamuri si Xavi iu besua një revolucion. Pas një viti e gjysmë e pavarësisht eliminimit të hershëm në Champions League, frytet e këtij revolucioni erdhën. Barcelona fitoi Superkupën e Spanjës dhe është gati të festojë titullin kampion. Ish-kapiteni ka meritën e promovimit dhe vlerësimit të talenteve e produkteve të kanterës si Gavi dhe Pedri. Ata u vendosën në mënyrë perfekte në një kontekst të përbërë edhe nga lojtarë me përvojë si Lewa, De Jong dhe Kessié.
SUKSESET NË FUSHË NUK FSHIJNË PROBLEMET
Rilindja sportive e klubit pas disa sezoneve të kaluara duke parë triumfet e Madrid është pothuajse e plotë. Megjithëse stuhia vazhdon të egërsohet jashtë fushës. Pas bilancit negativ katastrofik në 2020/2021 (pothuajse gjysmë miliardë euro) klubit iu desh të përdorte një dredhi për të mbyllur buxhetin e 2021/2022 pozitivisht. Fillimisht u shitën 10%, më pas 15% të tjera të të drejtave televizive të ndeshjeve të saj të La Liga deri në vitin 2047 në fondin e investimeve Sixth Street. Një operacion i domosdoshëm edhe për fushatën e blerjeve të verës së kaluar.
Problemeve financiare iu shtua skandali Negreira. Shpërthyen akuzat për korrupsion nëpërmjet pagesave për kompaninë në emër të tij. Negreira kujtojmë se ishte zëvendëspresidenti i komitetit teknik të arbitrave të La Liga në atë kohë. Si personi në fjalë ashtu edhe klubi katalanas u mbrojtën duke pretenduar se paratë përfaqësonin një tarifë të rregullt për disa konsulenca. Por prokuroria e zakonshme, si dhe FIFA dhe UEFA, vazhdojnë të hetojnë çështjen, që rezulton e parashkruar për drejtësinë sportive spanjolle. Me pak fjalë, e tashmja flet për një festë tashmë gati për të shpërthyer, por hijet për të ardhmen mbeten.
