Julia Ituma, volejbollistja e Igor Novara, u gjet pajetë rreth orës 5:30 të mëngjesit të së enjtes. 18-vjeçarja u rrëzua nga dritarja e katit të gjashtë të hotelit Burhan Felek Sports Hall në Stamboll. Aty ajo po qëndronte me ekipin, në transfertë për ndeshjen e kthimit të çerekfinaleve të Champions League kundër Eczacibasi. Nuk dihen ende shkaqet që çuan në vdekjen e të resë, e cila kishte lindur në Milano nga prindër nigerianë. Ituma ishte në sezonin e parë me skuadrën Igor Novara pas largimit nga Club Italia. Do të kryehet autopsia.
HETIMET E POLICIË TURKE
Policia turke po heton ngjarjen dhe po shqyrton videot nga kamerat e sigurisë. Në pamjet e publikuara nga portali turk Dha, Ituma shihet në hotel nga ora 22.30 deri në orën 23.50. Pasi ecën në korridor, ajo ulet në dysheme duke e vendosur fytyrën mes këmbëve. Më pas ngrihet dhe shkon në dhomën e saj.
KUSH ISHTE JULIA ITUMA
Ituma, e lindur në vitin 2004 dhe e gjatë 192 cm, konsiderohej si një nga talentet më premtuese të volejbollit italian. E lindur në Milano nga prindër nigerianë, ajo kishte mbërritur në Novara në fillim të vitit. Ajo kishte veshur më parë fanellën e Club Italia, në A2, për tre sezone. Vitin e kaluar Ituma luajti dhe fitoi Kampionatin Evropian dhe Festivalin Olimpik Evropian për të Rinj me kombëtaren U19. Në vitin 2021, me U18, ajo ishte nën kampione e botës, pas humbjes në finale kundër Rusisë. Ituma kishte filluar të luante volejboll në moshën 11-vjeçare. Mes modeleve të saj të referencës ishte qendra kubaneze Robertlandy Simon, kampion i shumëfishtë me Lube Civitanova.
POSTIMI I NOVARA: "DHIMBJE E MALLËNGJIM"
"Igor Volley komunikon me dhimbje dhe mallëngjim të thellë vdekjen e parakohshme të volejbollistes italiane Julia Ituma. Tragjedia ka ndodhur në orët e para të ditës dhe dinamikat e ngjarjes po hetohen nga policia turke. Igor Volley dëshiron të shprehë ngushëllimet dhe pjesëmarrjen në dhimbjen e familjes dhe të dashurve të Julias. Klubi dhe të gjithë anëtarët e tij, të tronditur nga humbja, do të mbajnë një heshtje respekti për këtë çështje në pritje të rezultatit të hetimeve".
