Kaos i plotë në shtëpinë e Bayern Munich pas humbjes së rëndë të pësuar në Champions League ndaj Manchester City. Në fund të ndeshjes, e cila efektivisht i nxori gjermanët me një këmbë jashtë garës, në dhomën e zhveshjes bavareze shpërtheu një sherr i dhunshëm. Sipas raportimeve të Bild, Leroy Sané dhe Sadio Mané janë përplasur fizikisht, me këtë të fundit që ka nisur grushtat me gjermanin.
Nerva të tensionuara, vërtet shumë të tensionuar, te Bayern pas humbjes së bujshme në Champions. Bavarezët e Tuchel, kundër çdo pritshmërive, kanë pësuar në fakt tre gola nga Citizens pa arritur të shënojnë. E mbi të gjitha nuk arritën të tregojnë futbollin madhështor që i lejoi të vinin deri në çerekfinale. Por kjo nuk është e gjitha, sepse përtej dëmit në fushë, erdhi edhe befasia në dhomat e zhveshjes.
Lexo më tej: Leksioni i futbollit i Guardiola e i pamëshirshmi Haaland: Manchester City favoriti kryesor për Champions
Të kthyer në dhomat e zhveshjes pas humbjes, ka pasur tension, madje edhe sherr mes lojtarëve. Sipas asaj që është rikonstruktuar nga Bild, ka qenë Sadio Mané ai që e nisi. Senegalezi ish-sulmuesi i Liverpool, i tërbuar nga rezultati, shënjestroi shokun e tij Leroy Sané. Sipas asaj që u mësua, gjermani mori një grusht në fytyrë dhe ka dalë i gjakosur nga përballja. Të dy u ndanë nga shokët e skuadrës, të tronditur dukshëm nga ngjarja. Për kthimin në Gjermani, Mané hipi në një makinë private, ndërsa Sané u kthye në autobusin e ekipit me shokët e tij të skuadrës.
