Nuk ka klasike në gjysëmfinalet e Kupës së Shqipërisë. Golgat kanë evituar përplasjen mes Tiranës e Vllaznisë në katër më të mirat e kompeticionit. Paraditen e sotme katër finalistët kanë njohur shortin për fazën gjysmëfinale të turneut. Vllaznia – Egnatia dhe Tirana– Teuta janë ciftet gjysmëfinaliste të Kupës së Shqipërisë.
Për Vllazninë, edhe pse kishin shprehur dëshirën për tu përballur me Tiranën, shorti ka nxjerrë përballë Egnatian: “Mendoj se të katërt skuadrat janë të forta. Vetë kampionati e ka treguar se diferencat janë të vogla. Egnatia ka treguar gjatë kampionatit që ka stabilitet dhe ka lojtarë cilësorë. Shpresoj që ky është momenti që Vllaznia të kualifikohet me Egnatian dhe të dalë në finale me njërën prej fituese të çiftit tjetër. Egnatia ka një ekip me lojtarë mjaft të mirë, por jam i bindur që kësaj radhe është radha jonë”.
Tirana, Teuta, Vllaznia dhe Egnatia kanë mësuar kundështarin e tyre të Kupës së Shqipërisë, në shortin e hedhur në ambientet e stadiumit “Air Albania”. I pranishëm ishin Sekretari i Përgjithshëm i FSHF-së, Ilir Shulku, shefi i Departamentit të Garave në FSHF, Marjus Sulejmani, përfaqësuesit e klubeve dhe përfaqësues të mediave.
Nga shorti i hedhur u përcaktuan edhe dy çiftet gjymëfinaliste të këtij edicioni të Kupës së Shqipërisë që janë: Vllaznia – Egnatia dhe Tirana– Teuta. Një rivalitet i përsëritur mes Tiranës e Teutës, por për drejtorin sportiv Tefik Osmani nuk ka më kundërshtarë të lehtë: “Jo të them të drejtën të tre skuadrat ishin të forta. Është ndeshje shumë e rëndësishme, sepse të dyja ndeshjet të çojnë në finale. Ka një tjetër specifikë Kupa, që e arrin shumë shpejt një trofe. Nuk është si kampionati që janë shumë ndeshje. Do ta vlerësojmë në maksimum dhe besoj se do të dalim me sukses”.
KALENDARI
Ndeshjet e kësaj faze, ku do të përcaktohen edhe finalistët e këtij edicioni janë planifikuar të luhen në datat 26 prill dhe 11 maj. Ndërkohë, finalja e madhe do të luhet më datën 1 qershor 2023.
Çiftet e fazës gjysmëfinale të Kupës së Shqipërisë:
Vllaznia – Egnatia (26 prill)/ Egnatia – Vllaznia (11 maj)
Tirana – Teuta (26 prill)/ Teuta – Tirana(11 maj)
Finalja 01.06.2023
