Ndeshja me Poloninë nuk është vetëm më e para e Grupit E të kualifikueseve të Euro 2024, por edhe më e vështira. Atëherë, mirë është që skuadra të jetë e përgatitur për të gjithë skenaret e mundshëm të një ndeshje futbolli. Tekniku Sylvinho, në debutimin e tij në pankinën kuqezi, nuk dëshiron të lërë asgjë për rastësinë për ndeshjen e 27 marsit në Varshavë. Grupi kuqezi ka zhvilluar seancën e radhës stërvitore në ditën e katërt të grumbullimit. Përgatitjet po bëhen në ambientet e Shtëpisë së Futbollit, ku skuadra do të qendrojë deri të dielën.
Kuqezinjtë, me kërkesë specifike të teknikut Sylvinho, sot kanë qenë të ndarë në dy pjesë. Ata kanë alternuar punën në palestër me stërvitjen në fushë, duke qenë se edhe sot në program janë dy seanca stërvitore. Braziliani Sylvinho dhe stafi i tij teknik kanë punuar gjithë kohës me situata të ndryshme loje dhe me përgatitje taktike. I gjithë grupi është shfaqur në formë të mirë dhe nuk ka probleme fizike për asnjë prej 23 të grumbulluarve.
Atmosfera është shumë pozitive dhe ka optimizëm për startin pozitiv të kualifikueseve të Europianit. Kombëtarja do të vijojë përgatitjet në Shqipëri deri të dielën. Kuqezinjtë do të udhëtojnë më pas drejt Varshavës. Pikërisht, aty ku të hënën në mbrëmje do të luhet sfida e parë e Euro 2024.
https://youtu.be/kD3pz7KZTA8
