Tekniku, Orges Shehi, mund të marrë frymë lehtësisht. Qendërmbrojtësi Jocelin Behiratche do të vazhdojë të mbajë veshur fanellën e Tiranës deri në fund të sezonit. Propozimi i ardhur nga Sheriff Tiraspol, me të cilin bardheblutë kishin ngritur një negociatë të përshpejtuar nuk ka qenë aspak bindës dhe i favorshëm. Kjo edhe për shkak të situatës së merkatos specifike të lojtarit nga Bregu i Fildishtë.
22 vjecari është shndërruar në një titullar të rregullt për Tiranën. 50% e kartonit të lojtarit mbahet nga një kompani menaxheriale. Kjo do të thotë se gjysma e vlerës së transferimit të Jocelin Behiratche do të shkojë në arkat e tyre. Moldavët e Sheriff nuk u ngjitën më shumë se 80 mijë euro në tratativë, gjë që i bëri drejtuesit e kryeqytetasve të reflektonin. Sipas asaj që filtron nga klubi, 40 mijë euro nuk janë mjaftueshëm që Tirana të humbasë një lojtar të rëndësishëm në luftë të plotë për titullin kampion dhe Kupën e Shqipërisë. Lojtari shkon në skadencë kontrate në qershor dhe nuk ka ndërmend të rinovojë me kryesuesit e kampionatit.
Në këtë pikë, bardheblutë menduan të mos e humbanin me parametër zero lojtarin, shitja e të cilit mund të ndihmonte në përmirësimin e situatës së vështirë financiare. Operacioni duhej të mbyllej brenda datës 28 shkurt, kur përfundoi edhe afati i transferimeve në Moldavi. Por në dritën e ofertës së konsideruar tepër të ulët të klubit nga Tiraspol, drejtuesit e Tiranës menduan se ishte më e arsyeshme të mbanin një lojtar me peshë në këtë fazë të sezonit ku mund të fitojnë të dy trofetë, se të inkasonin vetëm 40 mijë euro. Për më tepër që Shehi ishte ankuar gjithnjë për pankinë të shkurtër e mungesë alternativash.
