"Klubi i Futbollit Vllaznia, në kuadër të solidaritetit me të dëmtuarit e tërmetit në Turqi dhe Siri, ka realizuar sot tansfertën e shumës prej 15,300 euro. Ato janë mbledhur nga të ardhuruat e ndeshjes Vllaznia - Tirana". Një komunikatë e thjeshtë e klubit kuqeblu ka njoftuar gjestin e bukur, të menduar që para Klasikes. Në shenjë solidariteti me të gjithë ata që u goditën nga tërmeti vdekjeprurës, drejtuesit e Vllaznisë zgjodhën pikërisht ndeshjen me Tiranën.
Jo vetëm sepse është Klasikja e futbollit shqiptar, por edhe se luanin kryesuesit, interesimi do të ishte i madh. E në fakt publiku shkodran u përgjigj me pjesëmarrje të rëndësishme. Ashtu si kishte njoftuar më parë, të gjitha të ardhurat kanë shkuar në ndihmë të Turqisë dhe Sirisë. Me anë të një postimi në rrjetet sociale, klubi shkodran tregon se ka realizuar transferimin e të gjithave të ardhurat që u fituan nga ndeshja drejt dy shteteve të prekura.
Lexo më tej: Video/ Penalltia e dyshimtë e Markut hap kampionatin: Vllaznia mposht Tiranën mes polemikave
15 mijë e 300 euro janë një shumë e rëndësishme, ndaj dhe klubi i Vllaznisë ka dashur të falënderojë tifozët e saj për këtë solidarizim. "Me këtë rast Klubi falenderon përzermërsisht të gjithë tifozat kuq e blu për këtë shprehje të jashtëzakonshme solidarizimi. Edhe gjithë të tjerët që nuk ishin prezent në stadium, por me blerjen e biletave kontribuan në mbledhjen e kësaj shume. Dhe njëherë, ne shprehim ngushëllimet tona për të gjithë viktimat e tërmetit. E i urojmë një rikthim sa më të shpejtë të sigurt, të të dëmtuarve, në shtëpitë e tyre".
