Ekuilibër dhe lojë e luftuar edhe në kampionat. Erzeni dhe Teuta ndahen 1-1 në “Niko Dovana” për javën e 21 të Superiores. Një tjetër rezultat i rëndësishëm për Martinin, që nuk ka humbur asnjë ndeshje me shijakasit në tre përballjet e fundit në harkun e pak javëve. Vitor Leao ishte ai që i evitoi një humbje të rëndë Kapllanit, pasi pa të tijtë të shkonin në disavantazh që në minutën e 7' nga Kallaku.
Derbi u zhbllokua shumë shpejt në favor të durrsakëve, që u duk se shtruan korsinë për një fitore shumë me peshë. Në minutën e 7’ një penallti i dha mundësinë Kallakut të shënojë nga pika e bardhë. I saktë mesfushori, që ka përmirësuar ndjeshëm lojën e Teutës që kur mbërriti në janar. Erzeni e ndjeu goditje e madje rrezikoi të pësonte të dytin në goditjen e Jazxhi në minutën e 14’. Erzeni ka rezerva për gjykimin, pasi edhe në fundin e pjesës së parë episodi u gjykua kundër tyre. Pretendimet për një penallti ranë në veshin e 'shurdhër' të arbitrit, që i coi skuadrat në dhomat e zhveshjes me rezultatin 0-1.
MARTINI I PAKËNAQUR...
“Duhej të mbyllnim ndeshjen - tha Edi Martini, trajneri i Teutës -. Ishte ndeshje e vështirë, një derbi. Nervat ishin shumë të forta në të dy krahët. Në pjesën e parë luajtëm shumë mirë, patëm mundësi të shënonim edhe golin e dytë. Në të dytën ishte edhe era që nuk na lejoi të qarkullonim topin, i lëshuam territor Erzenit. Kishim mundësi të shënonim edhe golin e dytë, nuk arritëm, një pakujdesi solli barazimin".
[video width="928" height="520" mp4="https://cdnimpuls.com/lapsi.al/wp-content/uploads/2023/02/leao.mp4"][/video]
Teuta ndoshta e mendoi para kohe mbrojtjen e golit të shënuar. Kjo sepse në pjesën e dytë ritmin e diktoi Erzeni. Shijakasit ishin më kërkues me Kahrimanoviç dhe Krivicic, por goli duhet të priste minutën e 86'. Atëherë kur u duk një fitore e sigurtë e Teutës, Vitor Leao i dhuroi barazimin Erzenit. Ndajnë pikët Teuta e Erzeni me shijakasit në vendin e 3 me 31 pikë. Ndërsa durrsakët pozicionohen në vendin e 7 me 25 pikë.
