“Jam gëzuar shumë që rikthehem në futbollin shqiptar pas 10 vitesh. Në 2013 kemi luajtur në finale kundër Laçit, askush pas meje s’ka arritur të marrë Kupën. Kemi objektiva të mëdha së bashku me presidentin. Të rikthejmë Bylisin siç ka qenë në 2011". Me këto fjalë nostalgjike e entuziaste, teknik Naci Shensoi nis të komentojë triumfin 1-0 në debutim, kundër Vllaznisë. Pas katër humbjeve radhazi, Bylis e mbylli gjysmën e kampionatit me një 1-0 ndaj shkodranëve, që e vendos për momentin në zona më të qeta.
Në rikthim i pamenduar ai i Shensoi që në Ballsh ka lënë kujtime të mira, në një moment delikat për klubin e presidentin Kapllani: "Nuk është se e njihja skuadrën dhe kampionatin. Komplimente Vllaznisë se po luajnë shumë mirë. Jam shumë i lumtur që fituam vetëm me një stërvitje. U kënaqa kur pash sa pozitivë u treguan shkodranët. Por ne luftuam më shumë, edhe pse nuk luajtëm shumë mirë. Ne nuk i lejuam që të shënonin. Do bëjmë llogari për të menduar se çfarë duhet të rregullojmë, por do të shkojmë për të luajtur dhe fituar ndeshjet. Ia dedikojmë fitoren Besnik Kapllanajt”, e mbylli tekniku kosovaro-turk.
JOSA HUMBI NDESHJEN, POR MERRET ME BYLIS
“Nuk e filluam mirë lojën, jo se Bylis bëri ndonjë gjë të madhe, duhet të ishim më efikas në lëvizjet e sulmuesve tonë. E pësuam nga një gol standard". Tekniku i Vllaznisë, Mirel Josa, analizon lojën e kundërshtarit, duke harruar se ishte favoriti për të fituar ndeshjen e ndjekur kreun. Tekniku i shkodranëve e sheh si një problem impakti me ndeshjen, humbjen 1-0 të pësuar në Ballsh: "Problemi nuk ishte se Vllaznia sdonte të fitonte, ne duhet të ishim më të shpejt për të shkuar te zona kundërshtare. Patëm dy herë raste me Hakajn, duhet të ishim të shpejt në qendër të fushës. Ata e patën të lehtë të thyenin kundërsulmet tona. Rastet e Heriç dhe Hoxhajt nuk na mjaftuan për të shënuar".
I ngacmuar nëse u surprizua nga tekniku kundërshtar, Josa replikoi: "Nuk mund të them që pati një Bylis ndryshe. Thjesht ne duhet të ishim më të kujdesshëm. Nuk është problem euforie, thjesht duhet të përmirësohemi, do të shohim si do rikuperohemi”, tha Josa pas sfidës.
