Prokurorja e Përgjithshme e Ukrainës, Iryna Venediktova tha se autoritetet lokale kanë identifikuar ushtarin e parë rus të dyshuar për kryerjen e masakrës së civilëve në Bucha. Ai quhet Sergey Kolotsey, komandant i një njësie të Gardës Kombëtare Ruse. Sipas policisë dhe prokurorëve të Bucha, Kolotsey me origjinë bjelloruse vrau 4 burra të paarmatosur më 18 mars dhe torturoi një civil tjetër më 29 mars.
“Viktimat u gjetën me duar të lidhura pas shpine dhe me kapuç në kokë. Në trup kishin edhe shenja torture. Një nga viktimat e tij u detyrua gjithashtu, nën tortura, të rrëfejë aktivitete subversive kundër rusëve” – tha prokurorja e përgjithshme ukrainase që shtoi se ai e rrahu egërsisht civilin me një dorezë arme.
“Ai gjithashtu ka ekzekutuar një person duke i vendosur armën në tëmth dhe më pas ka qëlluar me një plumb pranë veshit” – shtoi ajo. Në mediat sociale qarkulluan foto të Sergey Kolotsey që bastiste një magazinë.
Disa civilë u gjetën të vdekur në rrugë, ndoshta të vrarë gjatë tërheqjes së ushtrisë ruse. Kremlini e quajti "masakrën e Buçës" një lajm të rremë të ndërtuar nga propaganda ukrainase. Shumë vëzhgues ndërkombëtarë thonë se kanë prova të qarta të masakrave të civilëve. Më pas u gjetën disa varre masive me qindra kufoma. ©LAPSI.al
