Katër zyrtarë të Kadastrës së Sarandës, janë vënë në pranga nga policia lokale. Arrestimet janë bërë gjatë operacionit të koduar ‘Heshtja 2’. Gjatë operacionit ‘Heshtja 2’, u arrestuan Andri Dhima (ish-drejtori), Vasil Lango, Saimir Braho dhe Erliton Ymeri , dhe u shpall në kërkim shtetasja Kozeta Statha.
Njoftimi i Policisë së Sarandës:
Finalizohet me sukses operacioni policor i koduar ‘HESHTJA 2’.
Ekzekutohen masat e sigurisë ‘Arrest në burg’ ndaj 4 shtetasve. Shpallet në kërkim bashkëpunëtorja e tyre.
Operacioni u zhvillua nga Komisariati i Policisë Sarandë, në bashkëpunim me Drejtorinë Vendore të Policisë Vlorë, nën drejtimin e Prokurorisë pranë Gjykatës së Shkallës së Parë Sarandë.
Hetimi i këtij rasti është bërë në funksion të procedimit penal të regjistruar nga Prokuroria pranë Gjykatës së Shkallës së Parë Sarandë, në vitin 2021, dhe në bazë të kallëzimit penal të ardhur nga Drejtoria e Antikorrupsionit pranë Ministrisë së Drejtësisë, në vitin 2022.
Shërbimet e Komisariatit të Policisë Sarandë, në bashkëpunim me Drejtorinë Vendore të Policisë Vlorë, nën drejtimin e Prokurorisë pranë Gjykatës së Shkallës së Parë Sarandë, pas një pune hetimore të mirorganizuar, kanë finalizuar me sukses operacionin policor të koduar ‘HESHTJA 2’. Si rezultat i këtij operacioni, është bërë i mundur dokumentimi i plotë ligjor i aktivitetit të kundërligjshëm në fushën e ndërtimeve pa leje, në Sarandë dhe Ksamil, si dhe janë ekzekutuar masat e sigurisë për veprën penale ‘Shpërdorimi i detyrës’, ndaj 4 shtetasve:
A. Dh., 34 vjeç, banues në Sarandë, me detyrë ish-drejtor i ASHK Sarandë;
V. L., 37 vjeç, banues në Sarandë, me detyrë përgjegjës i Sektorit të Hartografisë, pranë ASHK Sarandë;
S. B., 32 vjeç, banues në Sarandë, me detyrë hartograf pranë ASHK Sarandë;
E. Y., 37 vjeç, banues në Sarandë, me detyrë hartograf pranë ASHK Sarandë.
Gjithashtu u shpall në kërkim shtetasja K. S., 34 vjeçe, lindur në Sarandë dhe banuese në Bolonja, Itali, me detyrë ish-drejtoreshë e ASHK Sarandë.
Këta shtetas, në bashkëpunim me njëri-tjetrin, kanë shpërdoruar detyrën duke pajisur në mënyrë të kundërligjshme, me certifikata pronësie, disa shtetas, për pasuri, tokë dhe prona, në zonat bregdetare të qytetit të Sarandës dhe të Ksamilit.
Materialet janë referuar në Prokurorinë pranë Gjykatës së Shkallës së Parë Sarandë, për veprime të mëtejshme.
