Kur vjen puna te batutat, kunjat, gallata apo për ndonjë serial në Netlix, kryeministri Edi Rama i ka të rrallë shokët, por kur i duhet të flasë për financat, për procedurat shtetërore, për ligjet apo për ndonjë fushë tjetër të qeverisjes së vendit, aty është e vështirë ta mbash të përqëndruar më shumë se pak minuta.
Në këto momente delikate për vendin, kur e gjithë bota i ka sytë nga lufta në Ukrainë, Ramës iu desh të flasë për çështjet ushtarake. Me një fjalor të varfër dhe i pasigurtë për deklaratat që bënte, ku ra në sy shprehja e kryeministrit se ne “jemi me më të fortët”, apo se “kjo luftë nuk është në Playstation”.
Tjetër moment ishte kur harroi emrin e forcave elitë të ushtrisë amerikane, komanda e të cilave është vendosur në Shqipëri. Në këtë rast, ndërhyri Niko Peleshi që për ta fshehur injorancën e kryeministrit i pëshpëriste në vesh, në fakt duke e bërë akoma më qesharake situatën. Shikoni videon më poshtë:
https://streamable.com/w0ou9i
Kryeministri kishte në mendje Forcat Operacioneve Speciale të ushtrisë amerikane. Ata janë pararojë e çdo ndërhyrje ushtarake të mundshme të SHBA. Shtabi i Komandës Operacioneve Speciale është vendosur në Shqipëri, si një pikë qendrore për ndërveprimin e forcave speciale të vendeve të Ballkanit Perëndimor dhe në kohë të vështira si këto mirë është që kryeministri të jetë i informuar për një fakt të rëndësishëm si ky./Lapsi.al
