Një 38-vjeçar është arrestuar nga policia në Kamëz pasi ka qëlluar me armë zjarri në ajër. Në momentin e mbërritjes së policisë, ai ka refuzuar të hapë derën dhe ka kërcënuar se do të qëllonte në drejtim të tyre. Në momentin e arrestimit atij iu sekuestrua një armë zjarri kallashnikov, dy karikatorë me fishekë luftarak dhe 11 gëzhoja. Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
Njoftimi i policisë
Finalizohet operacioni policor i koduar “Shooting”, për goditjen e veprimtarisë kriminale në fushën e armëmbajtjes pa leje.
Operacioni nga Komisariati i Policisë Nr. 5.
Qëlloi me armë zjarri në ajër dhe më pas nuk iu bind urdhrit të punonjësve të Policisë, duke i kërcënuar se do qëllonte në drejtim të tyre, kapet dhe vihet në pranga autori.
Sekuestrohen një armë zjarri kallashnikov dhe fishekë luftarak.
Shërbimet e Komisariatit të Policisë Nr. 5 në Kamzë, pas njoftimit të marrë për të shtëna me armë në Kamzë, kanë organizuar punën për kapjen e autorit.
Pas informacioneve të marra në rrugë operative se mund të kishte qëlluar një person me precedent penal në fushën e narkotikëve, shërbimet e Policisë organizuan dhe zhvilluan operacionin policor të koduar “Shooting”.
Shërbimet e Policisë janë afruar në banesën në të cilën dyshohej se fshihej personi me armë dhe i kanë bërë thirrje që të hapte derën dhe t’i bindej kontrollit të Policisë.
38-vjeçari nuk i është bindur thirrjes së Policisë, por ka mbyllur derën dhe ka kërcënuar se do qëllonte në drejtim të punonjësve të Policisë.
Pas ndërhyrjes profesionale të punonjësve të Policisë është bërë e mundur kapja dhe arrestimi në flagrancë i shtetasit:
F. J., 38 vjeç, banues në rrugën “Moxart”, Kamzë, i dënuar më parë për veprën penale “Prodhimi dhe shitja e narkotikëve”, i cili u kap me armë në dorë, me fishkë në fole gati për qitje.
Në cilësinë e provës materiale u sekuestruan një armë zjarri kallashnikov, dy karikatorë me fishekë luftarak dhe 11 gëzhoja.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
