Ndërkohë, që Lulzim Basha dhe grupi parlamentar i PD do të votojnë pro zgjatjes së mandatit të vettingut, ish-kryeministri Sali Berisha deklaroi votën e tij kundër. Berisha ngriti akuza të rënda duke thënë se vettingu është përdorur për spastrime krahinore, klasore dhe fetare. Lideri demokratik tha se pengu dhe pengmarrësi janë në bashkëqeverisje, duke iu referuar kreut të PD dhe kryeministrit Edi Rama.
“Është bashkëqeverisja e pengut me pengmarrësin. Unë i kam shprehur të gjitha qëndrimet e mia ndaj këtij procesi gjigant korruptiv që shoqërohet në çdo hap me shkelje të rënda ligjore të konstatuara dhe që u përdor për gjah shtrigash nga Rama, me ndihmën e mikut të tij Soros. U përdorën disa standarde, u përdor për spastrime krahinore, klasore dhe fetare të sistemit të drejtësisë. U përdorën disa standarde. Ky është një proces i flakur që nuk e beson më shoqëria shqiptare. Unë kurrë nuk do të votojë atë që nuk e beson shoqëria shqiptare”, u shpreh Berisha.
