Kanë qenë një seri reagimesh këtë të martë nga selia e Partisë Demokratike kundër protestës së thirrur më 8 janar nga ish-kryeministri Sali Berisha dhe Komisioni i Rithemelimit. I fundit ishte nënkryetari i PD-së, Enkelejd Alibeaj që në një reagim në rrjetet sociale thotë se nuk ka asnjë protestë të vërtetë të shtunën.
“Janë klithma të zbehta të një agonie politike, në të cilën duan të tërheqin edhe demokratët. Sali Berisha nuk ka moralitet në këtë ndërmarrje antidemokratike.
Prej gati 4 muajsh është bërë çdo gjë që të zhvendoset objektivi i PD nga përballja me regjimin e Edi Ramës në një luftë të brendshme kundër Lulzim Bashës, për dobësimin e PD dhe të demokratëve.
Pseudoprotesta do të dështojë, si çdo përpjekje tjetër e deritanishme për të marrë peng PD-në për interesin e një njeriu të vetëm!
Është koha që Berisha të shkojë në shtëpi! Të lërë demokratët të fokusohen në të vetmen betejë të vërtetë, atë me regjimin e korruptuar të Edi Ramës për t’i dhënë vendit sa më parë një qeverisje të mirë dhe të drejtë!” – shkruan Alibeaj. ©LAPSI.al
