Ish-kryeministri Sali Berisha ka zbuluar se ka qenë absolutisht kundër koalicionit të PD-së me Partinë Socialiste.
Gjatë një interviste për “Ora News”, ish-kryeministri zbuloi bisedën që zhvilloi me Bashën për të cilin tha se në vitin 2017 i kërkoi dorëheqjen.
“Mund të them që në 2017 unë i kam kërkuar Bashës në zyrë dorëheqjen. Unë kurrë nuk kam ndërhyrë në vendimet e tij, as në organizimet e PD-së.
Djegia e mandateve? E kam thënë në një moment kur Gramoz Ruci shkeli ligjin e duke e shumëzuar me zero Parlamentin. Ajo ishte një shenjë revolte e imja, por unë s’kërkova kurrë në grup parlamentar të digjen mandatet sepse janë kundër vendimit tim.
Kur Basha mori vendim i thashë kjo mund të çojë në fitore, por edhe në katastrofë. PD do të ketë probleme me komunitetin ndërkombëtar. Unë nuk pranoj që të shkel parimet universale.
Ka pasur dy gjëra që unë isha kundër, kundër koalicioneve me Edi Ramën. Unë jam testuar për këtë. Më kanë ardhur në zyrë njerëz të Bashës dhe më kanë pyetur çfarë mendon për koalicionin me Ramën, unë i kam thënë jam kundër, kam qenë i prerë”, - tha Berisha.
Ish-kryeministri ka hedhur akuza të forta ndaj Bashës, për të cilin tha se ka ndikuar për shpalljen e tij non-grata.
“Mua më është thënë muaj nga Uashingtoni që më parë se Lulzim Basha i thoshte ambasadores Yuri Kim se çdo gjë në PD e kontrollon Berisha dhe unë jam në kontroll të njerëzve të tij.
Më kanë thënë edhe burime të brendshme më vonë se e ka bërë këtë denoncim. Madje shkoi gjer në atë shkallë sa i thoshte se duhet të dalim të bisedojmë në ballkon se kemi frikë se ai mund të vendosë përgjues,” -u shpreh Berisha. ©LAPSI.al
