Ndërkohë që në Komisionin e Ekonomisë diskutohej për paratë borxh që do të merren për të blerë energji, në sallë u fikën llampat. Nuk kuptohej mirë nëse ishte ndërprerë energjia elektrike apo jo, sepse mikrofonat punonin ende, por në sallë mbizotëroi errësira. Kreu i OSHEE-së Ardian Çela vazhdoi raportimin, duke e përcjellë situatën me një batutë "edhe avioni bie ndonjëherë", ndërkohë që të gjithë deputetët nisën të qeshin. Video më poshtë:
[video width="848" height="384" mp4="https://cdnimpuls.com/lapsi.al/wp-content/uploads/2021/10/Fiken-llampat-ne-Komisionin-e-Ekonomise.mp4"][/video]
Por një prej deputetëve të opozitës, Arbi Agalliu përfitoi nga rasti të bënte një foto në sallën e zhytur në errësirë. Kjo provokoi irritimin e Ministres së Infrastrukturës, Belinda Balluku e cila i tha se veprimi i tij nuk ishte etik. Në debat e sipër, duke menduar se kamerat ishin fikur, ministrja shpërtheu në ulërima. Efekti qe i menjëhershëm tek Eduart Shalsi, që u alarmua sepse u njoftua që mbledhja ndërkohë ishte në transmetim live në Facebook. Video më poshtë:
[video width="848" height="384" mp4="https://cdnimpuls.com/lapsi.al/wp-content/uploads/2021/10/Ulerimat-e-ministres-per-deputetin-e-PD.mp4"][/video]
Kur mbledhja iu rikthye normalitetit, ministrja Belinda Balluku ishte më e qetë. Ajo nënvizoi se pavarësisht krizës, çmimet për konsumatorët nuk do të rriten: “Nuk parashikojmë që të kemi rritje të çmimeve dhe nuk është synimi ynë që të balancojmë çmimin e ulët me të cilin ia japim konsumatorit me çmimin e lartë me të cilin blihet” u shpreh ajo.
