Hetimet për zbardhjen e vdekjes misterioze të 4 turistëve rusë janë futur në ngërç. Kur grupi i hetuesve priste përgjigjet e analizave të ujit dhe ajrit në pishinën e mbyllur ku u gjetën viktimat, ISHP ua ka kthyer mbrapsht mostrat e dërguara me argumentin se ishin marrë në mënyrën e gabuar.
Policia dhe prokuroria e Kavajës tha se dërgoi mostrat që mbrëmjen e së premtes, por ato nuk janë prekur me dorë nga ekspertët që thonë se duhet të merreshin në mënyrë profesionale prej specialistëve të shëndetit publik.
“Ka një kërkesë vetëm për klorin dhe ujin. Sot do të vijë kërkesa tjetër. Dhe mostra do të merret sipas kësaj rregulloreje dhe sipas këtij standardi. Për të qenë transparentë, oficerët e policisë gjyqësore kishin sjellë mostrën jo sipas kërkesave të rregullores. Kishin marrë mostrat vetë, kjo mënyrë duhet të rregullohet njëherë e mirë dhe të ndahen detyrat e secilit” – tha profesor Arben Luzati për TCH.
“Në rastin konkret është përdorur klori pluhur dhe mostrat duhet të merren në mënyrë të veçantë” – tha Luzati që është pyetur edhe nëse mund të shkaktojë vdekje helmimi nga klori.
“Ka irritime, vështirësi... Kur ka klor të tepër japin, por deri në vdekje nuk kam dëgjuar. Flasim për pishina të mbyllura” – tha ai.
Sipas të njëjtave burime grupi i hetimit ka dërguar gabimisht edhe disa mbetje ushqimore pranë ISHP që janë kthyer pas dhe janë dërguar për ekspertim pranë AKU. Të gjitha këto veprime dhe përplasje mes institucioneve duket se kanë vëshorësuar më tej daljen e një konkluzioni për ngjarjen e rëndë ku humbën jetën 4 persona. ©LAPSI.al
