Ngërçi i reformës në drejtësi mund të marrë goditjen fatale në qershor të vitit të ardhshëm, kur mbaron afati i Komisionit të Pavarur të Kualifikimit, ndërkohë që vetingu nuk ka mbaruar as për gjysmën e gjyqtarëve dhe prokurorëve në vend. Më një Gjykatë Kushtetuese qe ka 6 anëtarë (Vitore Tusha më mandat të skaduar), më një Gjykatë të Lartë që ka 35 mijë dosje pezull dhe me një Prokurori të Përgjithshme që vuan nga mungesa e prokuroreve, ndërprerja e vetingut (kalimi në kompetencë të KLP dhe KLGJ) do të ishte një goditje kolapsuese për reformën në drejtësi.
Pikërisht për t'i dhënë oksigjen reformës, duhet ndryshimi i Kushtetutës dhe votat e Partisë Demokratike. Sot, Ministri i ri i Drejtësisë, Ulsi Manja ka kërkuar konsensusin e opozitës që të ndërhyjnë në kushtetutë për të zgjatur mandatin e KPK dhe Komisionerit Publik. Kjo tha Manja po bëhet edhe në konsultim me SHBA dhe BE.
"Mbarimi i mandatit të KPK dhe Komisionerit Publik mbaron në 17 qershor 2022. Janë 801 subjekte per tu rivlerësuar janë 431 subjekte të vetura dhe mbeten në proces 370 subjekte. Për të garantuar vijueshmërinë e këtij procesi ne mendojmë dhe jemi në komunikim me SHBA dhe BE që ky proces të përfundohet nga organet e vettingut. Ne do të kërkojmë edhe konsensusin e opozitës që mandati i i KPK dhe Komisioneri Publik të zgjatet deri në përfundim të procesit të vettingut deri në rivlerësimin e plotë të subjekteve. Zgjatja e mandati kërkon ndërhyje në kushtetutën dhe ne nuk i kemi votat e nevojshme dhe për këtë do të kërkojmë konsensusin e opozitës", tha Manja.
Vetë Rama ka kërkuar para dhe pas zgjedhjeve bashkëpunim me Lulzim Bashën, duke theksuar se për ofertën e tij të bashkëpunimit, nuk ka vija të kuqe.
