Raporti i Komisionit Europian për çeljen e negociatave me Shqipërinë, që do të bëhet publik këtë të mërkurë, nuk pritet të ketë befasi, pohon radioja gjermane Deutsche Welle. Por megjithëse ai pritet të rekomandojë edhe kësaj radhe çeljen e negociatave për anëtarësim për Maqedoninë e Veriut dhe Shqipërinë, tre vende europiane vazhdojnë të jenë tejet negative për hapjen e tyre këtë qershor.
"Sa i përket çeljes së negociatave për Shqipërinë situata nuk ka ndryshuar me Francën si një kundërshtare me peshë e çeljes së negociatave, e përkrahur nga vende si Holanda dhe Belgjika", nënvizon media publike gjermane që shton:"Më parë është spekuluar se qëndrimi negativ i Francës për zgjerimin ka qenë i lidhur me zgjedhjet për Parlamentin e BE-së dhe ndikimin që një vendim i tillë mund ta ketë në këto zgjedhje. Rezultatet e zgjedhjeve nuk përmbushën frikën e forcimit të së djathtës në nivel evropian, por pozita e Presidentit Makron është goditur, pasi partia e tij humbi kundrejt ekstremit të djathtë të udhëhequr nga Marine Le Pen në Francë. Mbetet të shihet se si ky rezultat do të ndikojë në qëndrimin francez".
Raporti pritet të rekomandojë, ashtu sikurse vjet, hapjen e negociatave për ne dhe fqinjin tonë lindor, por vendimi final për çeljen e negociatave bëhet nga Këshilli Evropian ku marrin pjesë krerët e vendeve anëtare.
Raporti pritet të përmbajë vlerësime për ecurinë e reformave në vendet e Ballkanit, duke përfshirë edhe ato të cilat janë kyçe për Shqipërinë si funksionimi i institucioneve, sundimi i ligjit dhe lufta kundër korrupsionit. Sa i përket Shqipërisë dhe Kosovës, si pika kyçe do të mbeten lufta kundër korrupsionit dhe funksionimi i drejtë i gjykatave.
©Lapsi.al
