Analisti Fatos Lubonja akuzon kryeministrin Edi Rama se ashtu siç kapi të gjitha pushtetet po tenton ta bëjë të njëjtën gjë me drejtësinë. Në emisionin “Studio e hapur”, Lubonja tha tani se nuk dihet se kush do t’i drejtojnë gjykatat, dhe se më mirë do të ishte një drejtësi e korruptuar sesa e kapur nga qeveria.
“Ky rezultat, për mua mund të quhet dështim i Reformës në Drejtësi. Kjo pritej. Siç Rama bëri për të kapur pushtetet, edhe kjo ishte tentativë kapje dhe jo reformë e vërtetë.
Kujtoj kritikën e Komisionit të Venecias që thotë se “një reformë kaq radikale ka shumë rreziqe dhe sjell destabilizim të gjyqësorit”. Ajo flet edhe për kapjen e sistemit të drejtësisë nga mazhoranca. Të gjitha po vërtetohen. Ky është destabilizim i sistemit të drejtësisë.
Njerëzit thonë se po hiqen disa njerëz të korruptuar. Në këtë aspekt që ndoshta dhe gënjehen një pjesë njerëzish. Gjykoj se duhet parë përtej. Mirë që u hoqën këta, por çfarë po na vjen? Po na vjen një drejtësi më pak e dëmshme? Një drejtësi e kapur nga mazhoranca është goxha më e dëmshme. Shikoni Arta Markun, që s’ka lënë ligj pa shkelur, si me Kukësin, Xhafajn apo Teatrin. Këtu bërtasin edhe rastet flagrante të korrupsionit” – thotë Lubonja. ©LAPSI.al
