Turbulloi shumë gazetarë dhe politikanë në Greqi deklarata e kryeministrit grek Aleksis Tsipras, për "piramidat kufitare me Shqipërinë", si një ndër çështjet e pazgjidhura të kufirit. Shumë gazetarë dhe analistë politikë filluan të pyesin dhe të kërkojnë në internet “ç’janë këto piramida në kufi me Shqipërinë”?
Kjo detyroi qeverinë të sqarojë se kjo çështje kishte të bënte me mirëmbajtjen e piramidave kufitare me Shqipërinë. Sipas shpjegimit, marrëveshja e Luftës së Dytë Botërore me të cilën u vendosën kufijtë greko-shqiptarë parashikonte vendosjen e piramidave në vendet ku ndaheshin “ujërat e shiut”.
Në këto pika, për shkak se nuk kishte kufij natyror apo mur, u vendosën rreth 80 objekte guri në formë piramidale, shkruan Respublica. Ato janë deri në dy metra të larta dhe në njërën anë shkruajnë “Greqia” dhe në anën tjetër “Shqipëria”. Këto piramida ruhen në intervale të rregullta, ndonëse kanë lëvizur disa herë për shkak të fenomeneve natyrore.
