Rikthimi i “Big Brother” këtë të shtunë duket se ka entuziazmuar së tepërmi stafin e Top Channel. Jo më kot, siç mund të kuptohet dhe nga publiciteti që i bëhet në çdo program, gjithë forcat duket se janë përqëndruar tek ky reality show. Madje, për të shtuar kuriozitetin dhe për t’i dhënë rëndësinë e merituar një prej programeve më të shikuara të këtij televizioni, Top Channel kish organizuar dhe një festë me banorët e dikurshëm të “Big”-ut.
Siç shihet dhe nga kronika e transmetuar në “Wake Up”, në festën madhështore të mbajtur në “Hotel Plazza”, nuk munguan personazhet e spikatur të “Big Brother”. Por një xhest i cili duket se mori vëmendje, është puthja që ish-prezantuesi i këtij programi, shkëmbeu me kolegen Arbana Osmani. Si për t’i kaluar stafetën dhe për të shuar përfundimisht zërat për krisjen e dikurshme të shoqërisë së tyre, Ledion Liço dhe Arbana Osmani pozuan përpara aparatit të “Bordo”. Natyrisht që një festë e tillë nuk do të kishte kuptim pa alkool, të cilin prezantuesi i “Wake Up”, Isli Islami e ka vënë në dukje në kronikën e tij.
