Specialistët e Sektorit për Hetimin e Krimit Ekonomik dhe Financiar në DVP Tiranë, në bashkëpunim me Komisariatet Nr. 1 dhe Nr. 2, kanë finalizuar gjatë 24 orëve të fundit dy operacione policore të koduara “Shuma” dhe “Imazhi”, duke vënë në pranga autorët e disa rasteve të mashtrimit dhe vjedhjes me pasoja të rënda financiare.
Në kuadër të operacionit “Shuma”, Policia ka arrestuar shtetasit B. S., 31 vjeç, dhe S. M., 23 vjeç, si dhe ka shpallur në kërkim 31-vjeçarin R. H. Këta shtetas dyshohet se kanë përdorur Inteligjencën Artificiale për t’u prezantuar përmes mesazheve si personazhe të njohura te një 70-vjeçar që ushtronte aktivitetin e këmbimit valutor. Përmes kësaj teknologjie, ata e kanë mashtruar të moshuarin duke i marrë shumën prej 100.000 eurosh me arsyetimin se do t’ia kthenin pas disa orësh. Pasi paratë nuk u kthyen në afatin e premtuar, i dëmtuari njoftoi menjëherë Policinë.
Operacioni vijon për kapjen e personit që shkoi fizikisht te subjekti për të tërhequr paratë, si dhe për prangosjen e bashkëpunëtorëve të tjerë.
Gjatë operacionit të dytë të koduar “Imazhi”, u bë i mundur ndalimi i shtetasit të shpallur në kërkim G. B., 37 vjeç. Ky shtetas akuzohet se më 14 gusht 2026 ka mashtruar punonjësit e dy bizneseve në rrugët “Brigada VIII” dhe “Teodor Keko”, duke u marrë 20.000 lekë me pretendimin se ishte mik i pronarëve. Gjithashtu, më 21 gusht, i njëjti person ka vjedhur një çantë me 25.000 lekë brenda një subjekti në rrugën “Skënder Luarasi”.
Nisur nga përdorimi i formave të reja të krimit kibernetik dhe mashtrimit, Policia e Shtetit u bën thirrje qytetarëve dhe administratorëve të subjekteve që të tregojnë kujdes të shtuar. Autoritetet udhëzojnë që në asnjë rast të mos jepen para apo të dhëna personale për persona të paverifikuar që kontaktojnë përmes mesazheve apo videove të krijuara me Inteligjencë Artificiale, si dhe kërkojnë denoncimin e menjëhershëm të çdo rasti të dyshimtë pranë strukturave policore.
