Prokuroria e Posacme ka hapur disa procedime penale lidhur me tjetërsimin e pronave ndër vite dhe sidomos në zonat bregdetare, por ajo që u raportua sot nëpër rrjetet sociale dhe në disa media online për kontroll në zyrën drejtoreshës së përgjithshme të Agjencisë Shtetërore të Kadastrës, Lorena Goxhobelli, nuk është një lajm i vërtetë.
As pretendimi për sekuestrim të telefonit të saj celular, mëson Lapsi.al nga burime pranë BKH-së dhe gazetarëve që ndjekin nga afër veprimtarinë e SPAK.
Në prill të këtij viti SPAK kishte thirrur ish-drejtoreshën e Kadastrës dhe IKMT-së, Dallëndyshe Bici si person në dijeni për dosjen e AKSHI-t.
Rreth një vit më parë, Gjykata Kushtetuese vendosi kufizime të rrepta për SPAK-un lidhur me sekuestrimin dhe këqyrjen e celularëve. Sipas një vendimi, Prokuroria nuk mund të sekuestrojë apo të kontrollojë të dhënat dhe komunikimet në celularë pa një vendim të mëparshëm nga gjykata.
Autorizimi i gjykatës do të jepet pas një seance me të dyja palët prezent, përdoruesin e pajisjes telefonike dhe prokurorinë. Kjo e fundit duhet të caktojë qartë dhe brenda objektit të hetimit se cilat mesazhe, dokumente, foto apo çdo material tjetër kërkohen për përdor.
Prej nisjes së punës, Prokuroria e Posaçme ka sekuestruar mbi 1100 celularë dhe ka përdorur të dhënat e nxjerra prej tyre në dhjetra hetime të rëndësishme të lidhura me dosjet e korrupsionit.
