Protesta qytetare kundër qeverisë hyn sot në ditën e saj të 40-të, duke u kthyer në një nga mobilizimet më të gjata qytetare të viteve të fundit në Shqipëri.
Prej 40 mbrëmjesh, protestuesit mblidhen para godinës së Kryeministrisë, ku kërkojnë dorëheqjen e kryeministrit Edi Rama dhe largimin e klasës aktuale politike.
Edhe një natë më parë, pas tubimit para Kryeministrisë, protestuesit marshuan në rrugët e Tiranës, duke ndaluar para Kuvendit dhe më pas pranë selisë së Partisë Demokratike, ku hodhën akuza edhe ndaj opozitës.
Gjatë protestave, qytetarët kanë ngritur shqetësime për korrupsionin, varfërinë, emigracionin, sistemin shëndetësor dhe arsimin. Ditët e fundit, në fokus të kritikave ka qenë edhe financimi me 4 milionë euro i koncertit të Kanye West, që protestuesit e konsiderojnë një shpenzim të pajustifikuar. Organizatorët deklarojnë se protesta është qytetare dhe do të vijojë deri në përmbushjen e kërkesave të saj.
