Policia antikorrupsion e Spanjës zhvilloi të mërkurën një kontroll në selinë qendrore të Partisë Socialiste të kryeministrit Pedro Sánchez në Madrid. Sipas mediave spanjolle, agjentë të Njësisë Qendrore Operative (UCO), një strukturë elitare e Gardës Civile, u dërgua për të mbledhur prova në kuadër të një hetimi në vazhdim mbi financimin e paligjshëm të dyshuar të partisë në pushtet.
Kontrolli vjen vetëm një javë pasi Gjykata Kombëtare ngriti akuza ndaj ish-kryeministrit José Luis Rodríguez Zapatero, një aleat i rëndësishëm i Sánchez dhe figurë historike e socialistëve spanjollë, për pastrim parash, trafik influence dhe vepra të tjera penale që lidhen me shpëtimin financiar të kompanisë ajrore Plus Ultra në vitin 2021.
Sipas portalit El Confidencial, operacioni i UCO-së është autorizuar nga Gjykata Kombëtare dhe lidhet me një hetim tjetër, të ndarë nga çështja Zapatero, që po mbikëqyret nga Prokuroria Antikorrupsion e Spanjës. Autoritetet gjyqësore spanjolle nuk iu përgjigjën menjëherë kërkesës së POLITICO-s për koment.
Qeveria e brishtë minoritare e Sánchez është vënë nën presion të fortë që pas publikimit të lajmit për paditjen ndaj Zapateros. Partitë rajonaliste që i mundësuan koalicionit të majtë të formonte qeverinë në vitin 2023, dhe që kanë qenë vendimtare për miratimin e ligjeve në parlament që prej atëherë, janë bërë gjithnjë e më të kujdesshme për lidhjen e tyre me kryeministrin dhe Partinë Socialiste, e cila është goditur gjatë vitit të fundit nga një seri skandalesh korrupsioni.
Aitor Esteban, kreu i Partisë Nacionaliste Baske, deklaroi të dielën se Sánchez duhet të shpallë zgjedhje të parakohshme para fundit të vitit, duke argumentuar se do të ishte “shumë e vështirë” që kryeministri të qëndrojë në pushtet deri në fund të mandatit aktual parlamentar në gusht 2027.
“Ka tashmë nëntë çështje të hapura, tani edhe Zapatero”, tha ai. “Do të ishte e papërgjegjshme të vazhdohej përtej vitit 2026 pa drejtim, pa buxhet, pa një shumicë të qëndrueshme dhe me një axhendë jashtë kontrollit e të mbushur me procese gjyqësore.”
Megjithatë, ky afat deri në fund të vitit mund të afrohet edhe më shumë pas kontrollit të së mërkurës në selinë e Partisë Socialiste. Një tjetër aleat kyç i Sánchez, Gabriel Rufián nga partia E Majta Republikane e Katalonjës, deklaroi të hënën se “vija e kuqe” për partinë e tij do të ishte prova e një korrupsioni të përhapur në formën e financimit të paligjshëm të partisë.
Rufián kujtoi se pasi Partia Popullore e qendrës së djathtë u provua se kishte përfituar nga një skemë e madhe ryshfetesh dhe korrupsioni, partia e tij mbështeti mocionin e mosbesimit të vitit 2018 që rrëzoi kryeministrin Mariano Rajoy. “Do të kërkonim zgjedhje nëse do të kishte një rast të ngjashëm me socialistët”, tha ai. “Është gjëja logjike për t’u bërë.”/ Përshtatur nga Politico.eu
