Qytetarët rikthehen edhe këtë të premte në protestë, duke shënuar ditën e 55-të të mobilizimit kundër qeverisë dhe kryeministrit Edi Rama. Protesta vjen një ditë pas përplasjeve para Kuvendit, ku policia përdori ujë me presion, gaz lotsjellës dhe spraj me piper për të shpërndarë protestuesit. Protestuesit goditën me vezë automjetet e deputetëve. Pas ndërhyrjes u shoqëruan në komisariat disa aktivistë.
Gjatë protestës së djeshme, qytetarët akuzuan policinë për përdorim të tepruar të forcës dhe deklaruan se mes të prekurve kishte të moshuar, fëmijë dhe persona me probleme shëndetësore.
Protesta, e cila nisi si reagim ndaj zhvillimeve në Zvërnec, është shndërruar në një lëvizje më të gjerë kundër qeverisë. Organizatorët vijojnë të kërkojnë dorëheqjen e kryeministrit Edi Rama, krijimin e një qeverie teknike dhe ndryshime kushtetuese. Edhe sot pritet që protestuesit të marshojnë në rrugët e kryeqytetit me pankarta dhe flamuj kombëtarë, duke përsëritur thirrjet "Rama, jep dorëheqjen", "Pa rini nuk ka Shqipëri", "Shqipëria kërkon revolucion" dhe "Ju erdhi fundi".
