Irani paralajmëroi të premten se përgjigjja e tij ndaj kërcënimeve të reja nga Shtetet e Bashkuara do të ishte “katastrofike” , pasi Uashingtoni u zotua të vendosë “sanksionet më të ashpra ekonomike në histori” që synojnë, siç thanë zyrtarët amerikanë, përmbysjen e udhëheqjes iraniane.
Komentet e Sekretarit të Thesarit të SHBA-së, Scott Besant, të enjten pasuan paralajmërimin e Presidentit Donald Trump për pasoja ekonomike për çdo vend që ofron “çdo formë mbështetjeje” për Iranin. Besant tha se më shumë detaje mbi paketën e re të masave do të shpallen të hënën.
Shefi i Shtabit të Përgjithshëm të Forcave të Armatosura të Iranit, Gjeneral Major Ali Abdollahi, deklaroi se përgjigja e Republikës Islamike do të jetë në shkallë të gjerë dhe vendimtare.
“Me gatishmëri të plotë në tokë, det, ajër, mbrojtje ajrore dhe hapësirë kibernetike, forcat e armatosura iraniane do t’u përgjigjen kërcënimeve të reja të armikut me goditje dërrmuese, ndëshkuese dhe shkatërruese”, raportuan mediat iraniane, duke cituar deklaratat e tij.
Kryetari i parlamentit iranian, Mohammad Bayer Ghalibaf , i cili luan një rol qendror në negociatat indirekte me Shtetet e Bashkuara, argumentoi se Uashingtoni tani ka arritur në përfundimin se nuk mund të mbizotërojë përmes konfrontimit të drejtpërdrejtë ushtarak.
Gjatë një vizite në Irak, ai theksoi se Teherani duhet të përgatitet të përballet me “sanksione të padrejta”, ndërsa akuzoi SHBA-në dhe Izraelin se po përdorin luftë ekonomike dhe “konjitive”.
Nafta dhe sanksionet
Çmimet e naftës mbetën të qëndrueshme të premten, por po shkojnë drejt një rritjeje të dytë javore radhazi, ndërsa tregjet shqetësohen për eksportet e naftës nga Gjiri.
Të enjten, çmimet arritën nivelin e tyre më të lartë në tre javë, pas kërcënimeve për sanksione të reja që synonin të bënin presion mbi Iranin për t’i dhënë fund konfliktit gati gjashtëmujor që ka bllokuar miliona fuçi nafte të Lindjes së Mesme.
“Nuk jam i sigurt pse tregjet e naftës reaguan në atë mënyrë”, tha Bessant për CNBC. “Nëse ushtrojmë presion maksimal ekonomik, atëherë kjo ndoshta do të thotë se nuk do të ketë rifillim të operacioneve ushtarake në shkallë të gjerë.”
Mijëra njerëz janë vrarë në luftë, e cila është përhapur në vendet e Gjirit dhe ka shkaktuar trazira të rënda në tregjet ndërkombëtare , pasi Irani demonstroi aftësinë e tij për të kufizuar lundrimin në Ngushticën e Hormuzit, përmes së cilës kalonte rreth 20% e tregtisë globale të naftës para shkurtit.
Uashingtoni dhe Teherani njoftuan dy herë marrëveshje armëpushimi, në prill dhe qershor, që synonin rivendosjen e lirisë së lundrimit në Ngushticën e Hormuzit dhe gjetjen e një rruge për t’i dhënë fund konfliktit. Megjithatë, të dyja marrëveshjet dështuan shpejt.
“Terrorizëm ekonomik”
Irani është përballur me sanksione të ashpra amerikane pothuajse vazhdimisht që nga Revolucioni Islamik i vitit 1979.
Ministria e Jashtme iraniane dënoi sanksionet ekonomike dhe tregtare të SHBA-së, duke i quajtur ato “terrorizëm ekonomik” që nuk do ta përkulin “aspak vendosmërinë e popullit iranian për të mbrojtur pavarësinë, dinjitetin dhe sovranitetin kombëtar të vendit”.
Besant përsëriti se do ta paraqesë paketën e re të sanksioneve në detaje të hënën.
“Ky është një goditje e dyfishtë. Ne po e mbajmë bllokadën ndaj Iranit dhe do të vendosim sanksionet më të ashpra në histori”, tha ai, duke iu referuar bllokadës detare amerikane të vendosur në prill dhe të pezulluar përkohësisht për një muaj në mesin e qershorit.”Kjo strategji do të funksionojë. Ne do ta çojmë këtë regjim drejt rrëzimit. Është koha që aleatët tanë dhe pjesa tjetër e bashkësisë ndërkombëtare të marrin një qëndrim”, shtoi ai.
