Dritë të reja po dalin mbi krimin e rëndë të ndodhur në Nea Smyrni, ku 48-vjeçari Altin Allmuça qëlloi për vdekje 45-vjeçaren Julieta Obzova dhe më pas u vetëvra. Nga verifikimet e fundit të autoriteteve greke mësohet se autori i krimit ishte i martuar dhe baba i një fëmije.
Sipas raportimeve nga mediat greke, bashkëshortja e 48-vjeçarit është marrë tashmë në pyetje nga policia, ku ka deklaruar se nuk kishte asnjë dijeni për ndonjë marrëdhënie paralele të tij me 45-vjeçaren.
Në kuadër të hetimeve, Policia ka zhvilluar kontrolle të imtësishme në banesën e Allmuçës në zonën e Tavrosit, duke sekuestruar pajisje elektronike, dokumente dhe celularët e të dy viktimave. Hetuesit po ekzaminojnë aktivitetin online dhe komunikimet e tyre të fundit për të përcaktuar nëse ka pasur përplasje apo takime që mund të çonin në këtë akt tragjik.
Nga ana tjetër, nëna e Julieta Obzovës ka folur mes lotësh para gazetarët, duke treguar se lajmin tragjik e kishte mësuar nga vajza e saj tjetër pak pas ngjarjes. Ajo tha se 45-vjeçarja ishte e ndarë prej kohësh nga ish-bashkëshorti i saj dhe se kurrë nuk i kishte folur për ndonjë lidhje të re dashurie apo për shqetësime. Autoritetet po vijojnë analizimin e provave për të përcaktuar me saktësi natyrën e marrëdhënies mes tyre dhe motivin që e shtyu 48-vjeçarin drejt vrasjes.
