Një punonjës i Policisë së Shtetit dhe dy persona të tjerë kanë rënë në pranga në kuadër të operacionit "Basti i Fundit", të zhvilluar nga Agjencia e Mbikëqyrjes Policore (AMP), për goditjen e një aktiviteti të paligjshëm të lojërave të fatit dhe shpërndarjes së lëndëve narkotike. I arrestuari është efektivi Lutfi Dervishi, me detyrë Ndihmës Specialist i Policimit në Komunitet në Fushë-Krujë. Sipas AMP-së, ai dyshohet për "shpërdorim detyre" dhe "organizim ose ushtrim të veprimtarive të lojërave të fatit në kundërshtim me ligjin".
Gjatë kontrollit në banesën e efektivit u sekuestruan 119 fishekë të kalibrit 9 mm, ndërsa në ambientet e përdorura nga dy të arrestuarit e tjerë, Sabah dhe Fatmir Stafuga, u gjetën katër pajisje elektronike për lojëra fati, dy serverë, një pajisje DVR, doza të lëndëve të dyshuara narkotike, qese për paketimin e tyre dhe tre telefona celularë.
Dy shtetasit akuzohen për organizim të lojërave të fatit në kundërshtim me ligjin dhe prodhim e shitje të lëndëve narkotike. AMP bëri të ditur se hetimet vijojnë për të dokumentuar të gjithë aktivitetin kriminal, për të identifikuar persona të tjerë të përfshirë, si edhe për të verifikuar nëse ka pasur raste të favorizimit apo mosveprimit nga punonjës të tjerë të strukturave ligjzbatuese.
