Zëvendësdrejtori i Agjencisë Shtetërore të Kadastrës në Dibër, Daniel Gjura, është arrestuar në kuadër të një hetimi për një skemë të dyshuar mashtrimi dhe tjetërsimi pronash. Gjura, i cili më parë ka drejtuar ASHK-në Dibër dhe ka qenë kandidat i Partisë Socialiste në zgjedhjet e fundit parlamentare, akuzohet për "mashtrim" dhe "falsifikim dokumentesh", kryer në bashkëpunim. Sipas hetimeve, zyrtarë dhe ish-zyrtarë të Kadastrës në Dibër dyshohet se, përmes dokumenteve të falsifikuara, kanë regjistruar prona shtetërore në emër të shtetasit Teshar Doçi dhe familjarëve të tij.
Pas një hetimi shtatëmujor, gjykata ka caktuar masa sigurie për 14 persona. Për Teshar Doçin dhe një familjar të tij, Fatjon Çakrri, është vendosur masa "arrest në burg", pasi dyshohen si përfitues të skemës. Ndërkohë, noterja e përfshirë në çështje është shpallur në kërkim, ndërsa ndaj saj gjykata ka caktuar masën "arrest në shtëpi". Po me "arrest në shtëpi" do të hetohen edhe dy ish-funksionarë të Kadastrës së Dibrës. Gjashtë punonjës aktualë të institucionit dhe një familjar tjetër i Doçit janë lënë në masën e sigurisë "detyrim paraqitjeje".
