Grupi politik European Democrats ka reaguar pas deklaratës së artistes me famë botërore Dua Lipa lidhur me atë që është quajtur “Flamingo Revolution” në Shqipëri, duke vlerësuar se zëri i saj i ka dhënë jehonë ndërkombëtare debatit për mbrojtjen e mjedisit.
Në një postim në rrjetet sociale, European Democrats shprehen se kur Dua Lipa flet për “Flamingo Revolution”, ajo i jep dukshmëri globale një çështjeje që, sipas tyre, çdo demokraci duhet ta përballet: “Kush përfiton realisht?”.
Sipas këtij grupimi politik, deklarata e artistes “depërton përtej shkëlqimit që rrethon një zhvillim luksoz të mbështetur nga interesa të fuqishme”, ndërsa theksohet se mbrojtja e natyrës nuk mund të varet nga ndryshime ligjore të kryera me dyer të mbyllura dhe pa konsultim publik.
“Le t’i përhapim këto fjalë: Edi Rama nuk mund të përballojë më të injorojë atë që kërkon populli shqiptar”, thuhet në reagimin e European Democrats. Reagimi vjen pasi Dua Lipa shprehu publikisht mbështetjen e saj për kauzën e mbrojtjes së mjedisit në Shqipëri, duke rikthyer në vëmendje debatin mbi projektet e zhvillimit në zonat e mbrojtura dhe ndikimin e tyre në natyrë.
