Sali Berisha, ka deklaruar se me zgjedhjen e strukturave të reja drejtuese, partia ka përmbyllur procesin e konstituimit të institucioneve të saj.
Në një prononcim për mediat pas mbledhjes së Këshillit Kombëtar, Berisha e cilësoi këtë një ditë të rëndësishme për PD-në, duke theksuar se procesi i ripërtëritjes do të jetë i vazhdueshëm.
I pyetur nëse ky ekip e bën Partinë Demokratike gati për të qenë fituese në zgjedhjet e ardhshme, kreu i PD-së u shpreh se struktura e re është më e mira që ka pasur ndonjëherë kjo forcë politike.
“Me këtë sot, ajo ka një ekip që nuk e ka patur kurrë më parë. Një ekip si ky në kompetencë, eksperiencë dhe formim është ekipi më i epërm i kësaj partie në të gjitha kohërat”, deklaroi Berisha, ndërsa shtoi se në ekipin e ri ka përfaqësim të shtuar të të rinjve, grave dhe figurave me eksperiencë.
Lidhur me kritikat brenda partisë se procesi i ripërtëritjes nuk ka prekur të gjitha nivelet drejtuese, Berisha tha se çdo anëtar ka të drejtë të shprehë mendimin e tij, ndërsa theksoi se zgjedhjet janë zhvilluar me votim të fshehtë dhe me dy kandidatura.
“Këto zëra janë normale, çdo njeri ka të drejtë të shprehë mendimin e tij. Por siç e shihni, ne votojmë me dy kandidatura, votojmë fshehtas, dhe njëherë them, që kandidaturat e paraqitura para Këshillit Kombëtar janë kandidaturat më, do të thosha, të pakrahasueshme në kualitetet e tyre me të zgjedhurit e mëparshëm.”, u shpreh ai.
Sa i takon ndryshimeve të mundshme te drejtuesit politikë në qarqe, Berisha tha se procesi do të vijojë gradualisht.
“Ky është një proces i vazhdueshëm, por gjithçka do të bëhet doradorës. Do të presim rezultatet e votimit, por them edhe njëherë se ka një ripërtëritje të thellë të të gjithë udhëheqjes drejtuese të Partisë Demokratike, të paprecedentë”, përfundoi Berisha.
NJOFTIM PËR MEDIA
Berisha: PD mbyll procesin e konstituimit të të gjitha institucioneve të saj, ripërtëritja është një proces i vazhdueshëm
Ditë shumë e rëndësishme në të cilën PD-ja mbyll procesin e konstituimit të të gjitha institucioneve të saj. Kjo besoj se është e qartë, një frymë ripërtëritje në tërësi, në zbatim të motos më kryesore të Kuvendit që ishte ripërtëritja.
Pyetje: A është gati Partia Demokratike për të qenë fituese në zgjedhjet e ardhshme me këtë ekip që po votohet sot?
Sali Berisha: Me këtë sot, ajo ka një ekip që nuk e ka patur kurrë më parë. Të garantoj që një ekip si ky në kompetencë dhe eksperiencë, në formim, është ekipi më i epërm i kësaj partie në të gjitha kohërat dhe këtë ju mund të merrni të shqyrtoni me radhë. Në këtë ekip që ju keni sot para, ka personalitete të cilat kanë publikime në nivelet më të larta botërore. Ka prej tyre personalitete me eksperiencë të madhe në fushën e tyre, në fushën politike, pra unë them se asnjëherë në histori një ekip si ky nuk ka patur. Ka një përfaqësim më të madh se asnjëherë të të rinjve, dhe kjo është direktiva e Kuvendit, ka një përfaqësim të zonjave, ka pra një proporcionim të shkëlqyer të të gjitha sensitiviteteve, të të gjitha potencialeve të kësaj partie.
Pyetje: Zoti Berisha, ka pasur zëra kritikë edhe brenda PD-së që ky proces i ripërtëritjes ndoshta nuk është bërë i plotë në të gjitha shkallët. Pra ka shkuar deri tek niveli i sekretariatit apo edhe tek nënkryetarët, por kur ka shkuar, po themi për shembull, tek niveli i sekretarit të përgjithshëm, aty është stopuar ndoshta. Si i përgjigjeni?
Sali Berisha: Këto zëra janë normale, çdo njeri ka të drejtë të shprehë mendimin e tij. Por siç e shihni, ne votojmë me dy kandidatura, votojmë fshehtas, dhe njëherë them, që kandidaturat e paraqitura para Këshillit Kombëtar janë kandidaturat më, do të thosha, të pakrahasueshme në kualitetet e tyre me të zgjedhurit e mëparshëm.
Pyetje: Do të vijojë ky proces edhe me drejtuesit politikë në qarqe apo nuk do të ndryshojnë?
Sali Berisha: Tani, ky është një proces i vazhdueshëm, por gjithçka do jetë doradorës. Gjithçka do bëhet, ndryshimet që do dalin, se ne do presim rezultatet e votimit. Por them dhe njëherë, se ka një ripërtëritje të thellë të të gjithë udhëheqjes, drejtuese, të Partisë Demokratike, të paprecedentë.
