Mesazhe të forta për çështjen "Balluku" drejtuar Partisë Socialiste nga Bashkimi Europian. Gjatë vizitës në Tiranë, kreu i Komisionit të Punëve të Jashtme në Parlamentin Europian, David McAllister tha se ka biseduar me kryeministrin dhe deputetët socialistë për çështjen Balluku, duke e quajtur atë një test për adresimin e korrupsionit nga Shqipëria.
I pyetur në konferencë për ndryshimin e ligjit për çështjen Balluku dhe vota për arrestimin apo jo të saj në parlament, do të ndikojë në procesin e integrimit, McAllister u shpreh: "Çështja Balluku është një test kritik i Shqipërisë për adresimin e korrupsionit"
"Jam në dijeni të kësaj çështjeje. Kjo nuk është thjesht një çështje juridike, por është edhe një cështje e përgjegjësisë politike" tha McAllister i cili theksoi se përfaqësuesit e Bashkimit Europian "Nuk janë thjesht vëzhgues të situatës, por edhe po mbështesin institucionet e pavarura" në luftën kundër korrupsionit.
McAllister vuri në dukje se Shqipëria ka të gjithë mbështetjen e Bashkimit Europian për integrimin, por duhet të japë prova konkrete dhe të vazhdojë të punojë akoma më fort për negociatat.
