Kryetari i Partisë Demokratike, Sali Berisha tha se Rama për dy muaj u përpoq të bënte grusht shteti për të mbrojtur Belinda Ballukun, e akuzuar dhe e marrë e pandehur nga SPAK për abuzime me tenderat në tunelin e Llogarasë dhe Unazën e Madhe.
Berisha tha se Rama prej dy muajsh përdori pushtetin e ekzekutivit për bllokimin e prokurorisë dhe ushtroi presion ndaj Gjykatës Kushtetuese për të mbrojtur Belinda Ballukun.
“Ishim në pragun e një grushti shteti brenda shtetit. Rama prej dy muajsh përdori pushtetin e ekzekutivit për bllokimin e prokurorisë dhe presione të të gjitha llojeve ndaj Gjykatës Kushtetuese për të mbrojtur bashkë hajduten e 50 mln eurove në tunelin e Llogarasë, për të mbajtur në detyrë bashkëautoren e vjedhjeve të qindra miliona eurove, për të mbrojtur bashkëhajduten që ndërtoi rrugën Qukës Qafë Plloçë”, tha Berisha.
Berisha deklaroi se Edi Rama është kërcënimi më i rrezikshëm që tejkalon edhe ato kërcënime të regjimit stalinist të Enver Hoxhës.
“Nëse shekullin e kaluar, Shqipëria u mbajt peng 45 vite, këtë shembull, në një kohë me një shpejtësi krejt tjetër, Shqipëria po përballet me pasoja akoma më katastrofike. Prej 13 viteve të fundit, pasoja që gërryejnë, rrënojnë çdo ditë vetë ekzistencën e shqiptarëve si banorë të saj. Me pasoja që ditën e sotme nga Brukseli, BE, për shkak të vjedhjes së papërmbajtur të shqiptarëve nga Ramaduro, dërgon paralajmërimin më ogurzi për Shqipërinë. Si kurrë më parë për ndonjë vend tjetër, paralajmërimi për zhbërjen nga e para të udhëtimit tonë 32-vjeçar plot sakrifica, shpresa, ëndrra drejt BE. Miq, e kemi quajtur Rilindjen qeveri të paligjshme sepse e tillë është. Kemi çdo dokument që fakton farsën zgjedhore të 11 majit. E kemi quajtur narkoshtet sepse i tillë është. Kemi 7 rezoluta ku partitë kryesore që drejtojnë sot në Europë dhe në botë pajtohen me këtë fakt. Por jemi treguar të butë. Jemi treguar të kursyer me emërtimet tona”, tha Berisha.
