Dy shtetas anglezë nga qyteti i Jork-ut, Michael Mulvana, 32 vjeç dhe Jobie Tyers, 28 vjeç, janë dënuar me burgim të përjetshëm për një grabitje të dhunshme që rezultoi me vrasjen e shqiptarit Indrit Mustafaj, 26 vjeç. Dënimi i tyre kërkon që ata të qëndrojnë pas hekurave për të paktën 29 vjet.
Ngjarja e rëndë ndodhi gjatë një grabitjeje në apartamentin e një gruaje, ku shqiptari ndodhej. Gjatë incidentit, autorët plagosën rëndë gruan dhe më pas e goditën Mustafajn me hanxhar, duke e lënë atë të vdekur. Indrit Mustafaj u përpiqej të fshihej, por sulmi kishte pasoja fatale.
Mediat britanike shkruajnë se shqiptari kishte shkuar në Angli për të mbështetur familjen e tij. Babai i Mustafajt është shumë i sëmurë për të punuar, kështu që kur ishte ende adoleshent, djali i tij udhëtoi i vetëm nga Shqipëria për të gjetur punë në Mbretërinë e Bashkuar dhe për t'i dërguar para babait, nënës dhe dy motrave të tij.
Vdekja e tij i ka lënë ata të shkatërruar financiarisht dhe emocionalisht, thanë ata në një deklaratë personale të lexuar para gjykatës.
"Ne të gjithë zgjohemi me dhimbje dhe biem në gjumë me pyetje," thanë ata. "Ndikimi tek ne është i pamatshëm. Ai ishte i sjellshëm, ishte i butë, ai ishte dashuria e jetës sonë." Mustafaj nuk e pa kurrë familjen e tij pasi u largua për në Angli, thanë ata.
Atij iu deshën 9 vjet për të mbledhur fonde shtesë për të paguar biletën e kthimit për në shtëpi dhe po planifikonte t'i surprizonte me një vizitë kur u vra një muaj para ditëlindjes së tij të 27-të. Lajmi për vdekjen e tij e tronditi aq shumë nënën e tij saqë ajo tani "jeton në heshtje". Ata shtuan se nuk i urrejnë vrasësit e të dashurit të tyre, por donin drejtësi.
Gjykata e Kurorës së Leedsit dëgjoi se Mustafaj kishte udhëtuar çdo ditë për të paktën 1 javë nga Bradfordi në York, ku ai jetonte në një dhomë. Ai gjithmonë mbante një hanxhar me vete duke e vendosur nën shtrat. Vrasësit e tij të armatosur me një levë, hynë me forcë në apartament. Ata përdorën armën e tij për ta vrarë u tha në Gjykatë.
Kryeinspektori Fran Naughton tha se Mustafaj ndoshta e mbante hanxharin me vete "me qëllimin për ta përdorur atë në vetëmbrojtje, në rast të një sulmi si ky. Por duke pasur një thikë, ti potencialisht po armatos sulmuesin tuaj.
Si detektivë, për fat të keq shohim njerëz që humbasin jetën në këtë mënyrë dhe gjithashtu shohim ndikimin në jetën e familjeve të tyre kur ata janë larguar. Të dyja këto pasoja janë të tmerrshme dhe tregojnë se sa e rrezikshme mund të jetë posedimi ose mbajtja e një thike.” - tha ai. /LAPSI.al
