Gjykata e Posaçme e Apelit vendosi sot të zhbëjë dënimet me burg të dhëna nga Shkalla e Parë për pesë zyrtarë të Bashkisë së Tiranës, të përfshirë në dosjen e njohur si “5D”. Me vendimin e Apelit, Eglantina Zere, Enkelejda Qyta, Bruno Koçi, Rivjola Baxha dhe Kristo Zhulati u vendosën në shërbim prove për një periudhë njëvjeçare, duke shmangur vuajtjen e dënimit me burg.
Pesë zyrtarët ishin veçuar nga pjesa tjetër e grupit të të pandehurve, ku përfshihen edhe ish-drejtues të lartë të Bashkisë së Tiranës. Në Shkallën e Parë, Gjykata e Posaçme kundër Korrupsionit dhe Krimit të Organizuar kishte dënuar Eglantina Zeren me 1 vit burg, dënim që për shkak të gjykimit të shkurtuar ishte reduktuar në 8 muaj heqje lirie. Apeli vendosi pezullimin e këtij dënimi, duke e konvertuar atë në shërbim prove për një vit. Të njëjtin fat patën edhe katër të pandehurit e tjerë, të cilët në Shkallën e Parë ishin dënuar me nga 9 muaj burg, të reduktuar në 6 muaj pas gjykimit të shkurtuar.
Të gjithë u shpallën fajtorë për veprën penale të “shkeljes së barazisë në tendera”. Sipas hetimeve të SPAK, është provuar se Eglantina Zere, në cilësinë e titullares së autoritetit kontraktor “Tirana Parking”, institucion në varësi të Bashkisë së Tiranës, në bashkëpunim me Enkelejda Qytën, Bruno Koçin dhe Rivjola Baxhën, anëtarë të Komisionit të Vlerësimit të Ofertave, si dhe me Kristo Zhulatin, anëtar i Njësisë së Prokurimit, kanë krijuar avantazhe dhe privilegje të padrejta për bashkimin e operatorëve ekonomikë fitues “V.A.S Konstruksion” sh.p.k dhe “Rroku Guest” sh.p.k.
Shkeljet lidhen me procedurën e prokurimit për “Rikonstruksionin e sheshit të parkimit te Selman Stërmasi”, ku sipas prokurorisë, kriteret dhe procesi i vlerësimit janë manipuluar për të favorizuar operatorë të paracaktuar.
Në një tjetër proces të lidhur me dosjen “5D”, Gjykata ka dënuar gjithashtu me 1 vit burg ish-drejtoreshën e klubit shumësportësh “Tirana”, Debora Keçi, dënim i cili është konvertuar në 2 vite shërbim prove. Në këtë çështje janë dënuar edhe 8 ish-zyrtarë të tjerë, të akuzuar për abuzime në një tender për rikonstruksionin e një palestre, punimet e së cilës u realizuan nga shoqëria “5D”.
Dosja “5D” përfshin edhe dy ish-drejtorë të Bashkisë së Tiranës, Redi Molla dhe Mariglen Qato, të cilët janë ende në proces gjyqësor. Për ta, si edhe për Taulat Tushën, gjykimi vijon i ndarë me procedurë të zakonshme. Nga ky grup, vetëm Mariglen Qato ndodhet aktualisht në masën e sigurisë “arrest në burg”, ndërsa dy të tjerët janë liruar me masa më të lehta sigurie.
